Бэйдиэ сылдьар ыттары, куоскалары көрүүгэ үтүө санаалаахтар көмөлөһөллөр

Ааптар: 
Бөлөххө киир:

Дьокуускайга хаһаайына суох ыты, куосканы тутар пууҥҥа кыылы-сүөлү сөбүлүүр дьон бэйэлэрин баҕаларынан көмөлөһөллөр диэн Якутск.рф иһитиннэрэр.


Бүгүҥҥү күн туругунан, манна 190 ыт уонна 23 куоска баара бэлиэтэнэр. Пуун үлэһиттэрэ  ыттар ордук күһүн, дьон даачаларын саппыттарын кэнниттэн элбииллэрин, 300-кэ тиийэллэрин бэлиэтииллэр.

Пуун сылаас буудкалардаах, таһырдьа да сылдьалларыгар, сылааска да киирэллэригэр анаан оҥоһуллубут вольердардаах. Ыалдьыбыт ыты, куосканы сылаас сиргэ туталлар уонна эмтииллэр-томтууллар. Күҥҥэ иккитэ аһаталлар. Күн бастакы аҥаарыгар хааһыны, киэһээтин хотуобай анал аһылыгы биэрэллэр. Сорох аһылыгы кыылы-сүөлү сөбүлүүр, аһынар дьон уонна урбаанньыттар аҕалаллар.

«Соторутааҕыта манна өр кэмҥэ туппут ыппытын көрдөөн, Үрүҥ күөл диэки сырыттыбыт. Ыт аан бастаан манна аҕалылларыгар туруга мөлтөх этэ. Атаҕын улаханнык өлөрбүтүн эпэрээссийэлээн быыһаабыппыт. Ол ыппытын биир киһи кэлэн ылбыта. Оттон соторутааҕыта төлөпүөннээбиппит, ыппыт саҥа хаһаайыныттан баран хаалбыт«, — диир иччитэ суох ыты, куосканы тутар пуун (ППБЖ) начаалынньыга Валентина Дмитриева.

Дьокуускай куораттааҕы ыччат дьаһалтатын чилиэннэрин көҕүлээһиннэринэн, 2019 сыл балаҕан ыйыгар тэриллибит «Доҕорбутугар — дьиэ» диэн бырайыактарыгар кыылы-сүөлү сөбүлүүр дьону өйүүргэ ыҥырдылар. Манна даҕатан эттэххэ, бырайыак саҕаланыаҕыттан, бу пууҥҥа куорат олотоохторун, урбаанньыттар, бүддьүөт үлэһиттэрин, устудьуоннар уонна биэнсийэлээхтэр харчыларынан 40-тан тахса сылаас будка оҥоһуллубут. Соторутааҕыта икки будканы Дьокуускай куорат мэрэ Сардана Авксентьева биэрбит.

«Жилкомсервис» МУТ дириэктэрэ Валерия Билоус пууҥҥа турар ыттарга, куоскаларга күн аайы ас аҕалар үтүө санаалаах дьоҥҥо махтанар. Түгэнинэн туһанан, вольердарга, будкаларга тэлгииргэ уонна киртийдэҕинэ уларытан иһэргэ диэн от наадатын этэр. Ону сэргэ, пууҥҥа ыт, куоска элбээн иһэринэн (бүгүҥҥү күҥҥэ пуун приют курдук буолар), күннэтэ аһатар аһы таһынан, будкаларын, вольердарын өрөмүөннүүргэ, оҥорорго тутуу матырыйаала, от, о.д.а. наада буоларын ыйар.

Санатан эттэххэ, 2020 сыл тохсунньу 1 күнүттэн «Кыылы-сүөлү эппиэтинэстээхтик көрүү-истии» федеральнай сокуон олоххо киирдэ. Онно бэйдиэ сылдьар ыттары, куоскалары, чуолаан кырыктаах боруода ыттары, өлүөхтэригэр диэри тутарга анал приют тутулларын туһунан этиллэр. Атын ыттары стерилизациялыыр, прививкалыыр, чип туруорар уонна босхо ыытар көҥүллэнэр. Маннык тутууга ааҕан-суоттаан көрүүнэн 46 мөл солкуобай ирдэнэр. Ыттары тутуу биир сыллааҕы ороскуота,  СӨ ветеринариятын департаменын ааҕыытынан, 190 мөл солкуобайга тэҥ.

Көмөнү маннык аадырыстарынан оҥоруоххутун сөп:

Очиченко, 57 – «Пункт передержки безнадзорных животных»

пер. Базовай, 4 – База МУП «Жилкомсервис».

Пуун (ППБЖ) үлэтэ:

сэрэдэ-бээтинсэ  — 10:00 — 16:00

Субуота-өрөбүл —  10:00 — 13:00.

Бэнидиэнньик — өрүүр күн.

Оптуорунньук — санитарнай күн.

Ыкка, куоскаҕа аһы нэдиэлэ хайа баҕарар күнүгэр үлэ чааһыгар аҕалыаххытын сөп.  Ас тобоҕо ылыллыбат.

Төлөпүөн: 8-924-870-00-67

Хаартыска: openbusiness.ru

+1
0
+1
0
+1
0
+1
0
+1
0
+1
0
+1
0