Бэйдиэ сылдьар ыттары хонтуруоллааһыҥҥа “төгүрүк остуол” ыытылынна
Бүгүн Саха сирин уопсастыбаннай палаатата, Ил Түмэн дьокутааттара уонна Киһи быраабыгар боломуочуйалаах бэрэстэбиитэлэ бэйдиэ сылдьар ыттары хонтуруоллааһыҥҥа “төгүрүк остуол” ыыттылар.
Тэрээһини уопсастыбаннай палаата салайааччыта Николай Бугаев иилээн-саҕалаан ыытта. Ил Түмэн дьокутааттара, Киһи быраабыгар боломуочуйалаах бэрэстэбиитэлэ Сардаана Гурьева, Ветеринария департаменыттан Петр Петров, Вероника Ноттосова, ХИФУ бэрэсидьиэнэ Евгения Михайлова, ону сэргэ уопсастыбаннай палаата чилиэннэрэ кыттыыны ыллылар.
“Төгүрүк остуол” быһа эпииринэн барда. Бэйдиэ сылдьар ыттары хонтуруоллааһыҥҥа кыттааччылар үгүс этиини киллэрдилэр. Бу этиилэри барытын хомуйан, уопсастыбаннай палаата Ил Түмэн тохсунньуга ыытыллар мунньаҕар ырытыыга киллэриэҕэ, ону сэргэ Судаарыстыбаннай Дуума дьокутааттарыгар ыытыаҕа.
Санатан эттэххэ, бэйдиэ сылдьар ыттары хонтуруоллааһыҥҥа 498-с нүөмэрдээх федеральнай сокуон 2018 сыллаахха ылыныллыбыта, 2019 сыл тохсунньутуттан күүһүгэр киирбитэ. Бу сокуонунан уулуссаҕа бэйдиэ сылдьар ыттары уодьуганныыр көҥүллэммэт, хас биирдии эрэгийиэҥҥэ, нэһилиэнньэлээх пууннарга ыттары анал хаайар, көрөр-истэр сирдэр тэриллиэхтээхтэр этэ.
2021 сыл ахсынньы 29 күнүттэн Дьокуускай куорат Автодорожнай уокуругар ыттартан киһи өлүүлээх быһылаан тахсан, ыксаллаах быһыы-майгы биллэриллибитэ. Билигин уулуссаҕа бэйдиэ сылдьар ыттары тутуу хас да биригээдэнэн бара турар. Дьокуускай куорат суһал ыстааба иһитиннэрбитинэн, бүгүн 199 бэйдиэ сылдьар ыт тутуллубут.
Аграфена КУЗЬМИНА, edersaas.ru