Уус Алдан улууhун Бээрийэ нэhилиэгин оҕолоро сайыҥҥы сынньалаҥнарын туhалаахтык атааралларыгар анаан, Степан Степанович Аржаков аатынан бибилэтиэкэҕэ бэртээхэй куруhуоктар ыытыллыбыттар. Бу туһунан бибилэтиэкэ сэбиэдиссэйэ Туйаара Васильева сэһэргээтэ.
—Оҕолор икки нэдиэлэ устатыгар сайыҥҥы лааҕырга сылдьан элбэҕи биллилэр-көрдүлэр, үөрэннилэр. Программирование куруhуогар алта оҕо сырытта. Бу куруһуогу нэһилиэк оскуолатын учуутала Антон Константинович Васильев салайда. ХИФУ естественнай наукаларга институтун эколого-географическай отделение ПП-15 бөлөҕүн устудьуона Наталья Ядреева уонна биология кафедратын БО-17 бөлөҕүн устудьуона Альбина Назарова үүнээйи, үөн-көйүүр арааhын хомуйан үөрэттилэр. Манна 20 оҕо дьарыктанна, — диэн кэпсиир Туйаара Антоновна. Кини 14 оҕоҕо анимация куруһуогун салайбыт.
Куруhуоктарга оҕолор Бээрийэ тыатыгар, алааhыгар, от үрэххэ, үрэх сыhыытыгар үүнэр 200-кэ курдук үүнээйи арааһыттан, 100-чэкэ уу, хонуу үөннэрин хомуйан хатарбыттар. Өссө Күн Дьирибинэ «Көбүөхтүүрүн аанньа күөх киhиргэс», «Тураахтаах күүдээх», «Таракааннаах сахсырҕа» диэн үгэлэринэн, Бээрийэттэн төрүттээх ааптардар: Алексей Бэрияк «Күhүн», Иван Мигалкин «Куобахчаан», Клавдия Васильева «Кыылларым миэнэ» диэн хоһооннорунан бэртээхэй алта мульткиинэни оҥорбуттар.
Туйаара Антоновна практикаларын барбыт устудьуоннар Бээрийэҕэ салгыы хаалан үүнээйи, үөн арааhын үөрэтэр былааннаахтарыттан үөрэр. Ис сүрэхтэриттэн кыһаллар ыччаттар кэлэн оҕолорго билиини-көрүүнү биэрбиттэринэн киэн туттар. Түгэнинэн туһанан, кинилэр салайааччыларыгар Сардаана Гаврильевна Стручковаҕа, Прасковья Алексеевна Гоголеваҕа, Вилюра Егоровна Кардашевскаяҕа, Нина Григорьевна Давыдоваҕа үлэһит, кыһамньылаах практиканнарын иһин бээрийэлэр ааттарыттан махталын тиэрдэр. Нэhилиэгин үүнээйилэрэ үөрэтиллэн хааларыттан үөрэллэрин уонна салгыы чинчийэллэригэр эрэнэллэрин биллэрэр.
Биһиги корр., “Саха сирэ” хаһыат, edersaas.ru