«Библиотүүн-2018» дойду үрдүнэн бары бибилэтиэкэлэргэ үрдүк тэрээһиннээхтик ыытыллар. Уус Алдан улууһун Бээрийэ нэһилиэгин бибилэтиэкэрэ Туйаара Васильева нэһилиэктэригэр оҥорбут тэрээһиннэрин туһунан сырдатта:
— Аҕыйах ахсааннаах нэhилиэккэ улахан тэрээhиннэри тэрилтэлэри кытта кыттыhан бииргэ ыытар, хардарыта көмөлөсүhэр ордук, быдан хотуулаах, табыгастаах. Ол курдук быйылгы тэрээhиммитин почта филиала, Сэбиэскэй Сойуус Дьоруойа Владимир Денисович Лонгинов аатынан орто оскуола, «Үрүччэ» оҕо уhуйаана, «Кэскил» устуудьуйа, «Арчы» култуура киинэ, землеустроитель, Степан Степанович Аржаков аатынан бибилэтиэкэ буолан бары көмөлөөн тэрийдибит.
Бибилэтиэкэ кинигэлэрин билии араас салаатынан араарарынан, тэрээhиммитин бу салааларынан ыытарга кыһалынныбыт.
Холобур, медицинаҕа уонна общественнай наукаҕа батсаабынан икки араас вебинардары тэрийдибит Күнүс 12 чаастан саҕалаан «Эһиги ыйытыыларгытыгар быраастар хоруйдууллар» диэн вебинарга аҕыс быраас кытынна. Ол курдук, Удачнайга олорор Кузьмина Маргарита Ильинична, үрдүк категориялаах оториноларинголог, СӨ доруобуйа харыстабылын туйгуна; Покровскайтан Турантаева Мария Гурьевна, үрдүк категориялаах терапевт, СӨ доруобуйа харыстабылын туйгуна; Васильев Айсен Егорович, Мэңэ Хаңалас улууһунааҕы Киин балыыһа хирургияҕа отделын сэбиэдиссэйэ, үрдүк категориялаах хирург; Копырина Александра Гаврильевна, Уус-Алдан улууһун Киин балыыһатын терапевт отделениетын сэбиэдиссэйэ, 1 категориялаах терапевт; Бурцева Туйаара Николаевна, Майатааҕы сүрэх-тымыр ыарыыларын эмтиир киин бырааhа, 1 категориялаах невролог, СӨ доруобуйа харыстабылын туйгуна; Бурнашева Оксана Егоровна, Уус Алдан улууһун Киин балыыһатын эндокринолога, Васильева Татьяна Валентиновна, Дьокуускайтан 1 категориялаах онколог, республикатааҕы Онкологическай диспансер бырааhа, Слепцов Геннадий Петрович, Уус Алдан Киин балыыһатын анестезиолог-реаниматора олохтоохтор ыйытыыларыгар толору хоруйдары биэрдилэр. Онон тыа сирин дьоно-сэргэтэ маннык ньыманан үлэлээһиммитин улаханнык сэргээтэ, астынна.
Иккис «Эhиги ыйытыыларгытыгар юрист, буҕаалтыр, үлэлээх буолуу киинин, нолуок сулууспатын исписэлиистэрэ хоруйдууллар» диэн вебинарга Дьокуускайтан Васильев Егор Егорович, юрист; улуустааҕы нолуок сулууспатын исписэлииһэ Стручкова Акулина Егоровна, улуустааҕы үлэлээх буолуу киинин исписэлииһэ Крылова Мария Федоровна, «Бээрийэ нэhилиэгэ» МТ кылаабынай буҕаалтыра Аргунов Петр Петрович кыттыыны ыллылар. Манна эмиэ нэһилиэнньэттэн олус элбэх ыйытыы киирдэ. Вебинары тэрийиигэ «Уус Алдан МЦБС» МКТ дириэктэрэ Окоемова Варвара Николаевна көмөлөстө. Онон киниэхэ махталбыт улахан. Вебинарга уопсайа 229 ыйытыы киирдэ. Аҕыйах нэһилиэнньэлээх кыра нэһилиэк диэн туора турбакка, эбиитин суола-ииhэ мөлтөх, киинтэн ыраах сытар диэбэккэ, дьоммутун-сэргэбитин өйдөөн, өйөөн вебинар кыттыылаахтара олохтоохтор ыйытыыларыгар бириэмэлэрин аахсыбакка, күнү быһа хоруйдаабыттарыгар улаханнык махтана хааллыбыт.
Бээрийэлэр «Библиотүүннэрин» «Арчы» култуура киинигэр үөрүүлээхтик арыйбыттар. Долгутуулаах, күүтүүлээх тэрээһини оскуола учуутал дьахталларын «Саhарҕа» ансаамбыла (салайааччы Васильева Сардаана Алексеевна), устуудьуйаны салайар Васильев Михаил Иванович, уhуйаан иитиллээччилэрэ Амелия Никифорова, Вилена Васильева ырыалара, «Битэмииннэр» диэн монтажтара (салайааччы Васильева Екатерина Николаевна) ситэрэн-хоторон, киэргэтэн биэрбиттэр.
— Маастар-кылаастарбытын дьон-сэргэ улаханнык сөбүлээн үөрүүнэн сырытта. Ол курдук, «Техника уонна техническэй наукалар» диэн салааҕа «Сандалы» кулууп ас астааhыныгар, «Черепаха» торду оҥорорго, тыква иhигэр оҕуруот аһыттан рагу буhарарга, тыкваттан утах оҥорорго Васильева Марфа Иннокентьевнаны кытта мин үөрэттибит, сүбэ-ама биэрдибит. «Кукломания» уонна «Корзинаны баайыы» маастар-кылааһы оскуола учуутала Арсентьева Марианна Терентьевна тэрийэн ыытта, баҕалаахтар манна үөрэ-көтө үөрэннилэр.
«Естественнэй наукаҕа «Эрудиттар күрэстэһиилэрэ» буолла. Манна «Химия», «Физика», «Биология», «Информатика» уо.д.а., уопсайа алта ыстаансыйанан түөлбэлэр икки ардыларыгар сонун, бэрт сэргэх эстафетаны биология учуутала Атастырова Елена Васильевна уонна математика учуутала Васильева Надежда Гаврильевна толкуйдаан, тэрийэн ыыппыттара өрө көтөҕүллүүлээхтик барда. «Литература универсального содержания» салааҕа «Чуораанчык» сурунааллыын доҕордос» диэн дьиэ кэргэн күрэхтэһиитин физкультура учуутала уонна оскуола психолога Анатолий Анатольевич, Екатерина Прокопьевна Васильевтар тэрийдилэр. Чуораанчык фирменнэй бэргэhэтин оңорууга уонна Чуораанчыгы уруhуйдааhыҥҥа күрэстэстилэр. Анатолий Анатольевич оҥорбут «Чуораанчык» сурунаал макетыгар оҕолор үөрэ-көтө хаартыскаҕа түһэн күннээтилэр. Күөн күрэскэ уонтан тахса дьиэ кэргэн кыттан илин-кэлин түһүстүлэр.
Гуманитарнай наука салаатыгар «Аҕа уолунаан» хоhоон ааҕыытыгар күрэстэһиини төрүт культура учуутала Охлопкова Октябрина Кирилловна үрдүк тэрээһиннээхтик салайан, иилээн-саҕалаан ыытта. Тэрээhин аhыллыытын алын сүhүөх кылааhын уолаттарын ансаамбыла(салайааччы Васильева Сардаана Алексеевна) киэргэттэ. Манна алта дьиэ кэргэн кыттынна. Бары да ох курдук оҥостон, кустук курдук куоһанан кэлбиттэрэ, хоһоону туттан-хаптан ис сүрэхтэриттэн киһини эрэ долгутардыы ааҕаллара астык буолла. Түмүккэ кулууп дириэктэрэ Васильев Константин Константинович түөрт уолунаан кыайыылааҕынан таҕыстылар.
История салаатыгар «Сталинградская битва» виртуальнай музейы иитэр үлэҕэ оскуола директорын солбуйааччы Никифорова Акулина Валентиновна, история учуутала Борисов Николай Константинович, информатика учуутала Васильев Василий Васильевич тэрийэн, кэпсээн чахчы да улахан болҕомтону тардыбыттар. Дьон-сэргэ улаханнык сэргээн, кэрэхсээн бииртэн-биир ыйытыылары хойукка диэри биэрбиттэр. Онтон «Саамай, саамай…» диэн кинигэлэр күрэстэрин Арсентьева Марианна Терентьевнаны кытта Туйаара Антоновна Васильева тэрийбиттэр. Бу күрэскэ «Саамай улахан кинигэ» — 80х50см. кээмэйдээх кинигэнэн Охлопков Александр Алексеевич, «Саамай ыарахан ыйааhыннаах» — 5 кг ыйааһыннаах кинигэнэн Васильева Анастасия Степановна, «Саамай былыргы» латыын буукубатынан бэчээттэммит Абаҕыыныскай «40 ырыа» диэн кинигэлээх Кривошапкина Татьяна Ионовна, «Саамай кыра» кинигэлээх Васильева Екатерина Ивановна кыайыылаах тахсыбыттар.
Тэрээhиннэр барыта бүппүттэрин кэннэ «Разгрузка» диэн оскуола психолога Васильева Е.П. психологическай тренинг ыыппыт. Салгыы «Дерево добра» акция чэрчитинэн бибилэтиэкэ, оскуола, «Уйгу» оҕо түмсүүтэ түөрт дьиэ кэргэҥҥэ сыл иккис аҥарыгар «Чуораанчык» сурунаалга сурутууну бэлэхтээбиттэр. Маны сэргэ, бибилэтиэкэ бастыҥ кинигэлэрэ, «Абылаҥ» коллекционердар быыстапкалара туруоруллубут. Бу күн ас-үөл арааһа дэлэччи атыылааммыт.
Түгэнинэн туһанан «Библиотүүнү» тэрийээччилэр уопсай тэрээhиҥҥэ тэҥҥэ сүүрбүт-көппүт, түбүгүрбүт почта филиалын начальнигар Назарова Саргылана Гаврильевнаҕа, тэрээһини ыытарга туох баар киэргэтиини оҥорсубут землеустроитель Чемезова Анна Иннокентьевнаҕа, уотун-күөhүн, тыаhын-ууhун оңорбут, хааччыйбыт устуудьуйа салайааччытыгар Михаил Иванович Васильевка, кулууп дириэктэригэр Константин Константинович Васильевка махтаналлар.
Сардаана БАСНАЕВА, «Эдэр саас» хаһыат, edersaas.ru
+1
+1
+1
+1
+1
+1
+1