Бу сайын Дьааҥы Алыһардааҕар булуллубут тайах оҕотун ойуурга ыытар буоллулар. Бу быһаарыныыны “Орто дойду” зоопарк салалтата уонна Арассыыйатааҕы наука академиятын Сибиирдээҕи салаатын Криолитозона биологическай кыһалҕаларын институтун үлэһиттэрэ ылыннылар.
edersaas.ru
Саҥа төрөөбүт тайах оҕото ойуурга ийэтэ суох сылдьарын Дьааҥы олохтооҕо Владислав Рожин булан, кырачаан ыҥааҕы суосканан аһатан улаатыннарбыта. Бээчэ кыһын адаарыйа улааппыта, кини дьоҥҥо убаммыт буолан, ойуурга соҕотоҕун кыайан сылдьыа суоҕа диэн, зоопарк салалтатын кытары кэпсэтии ыыппыттара.
Зоопарк дириэктэрэ Лука Сафонов этэринэн, «Полярные авиалинии» хампаанньаны кытары кэпсэтии барбыт. Техническэй рейсинэн босхо аҕаларга сөбүлэспиттэр. Ол гынан баран, маннык рейстэр олус сэдэхтэр. Ыйы быһа күүтэн баран, тайаҕы айылҕа ураты харыстанар сиригэр ыытарга быһаарбыттар.
Онон, кулун тутар ыйга Арассыыйатааҕы наука академиятын Сибиирдээҕи салаатын криолитозона биологическай проблемаларын институтун уонна биологическай ресурс дирекциятын үлэһиттэрэ баран, Бээчэҕэ араадьыйалаах моойторугу кэтэрдиэхтэрэ. Оччоҕо кини ханна сылдьарын спутнигынан көрө-билэ олоруохтара, бэлиэ сирдэргэ от ууран, эбии аһатыахтара.
Ураты харыстанар сиргэ булчуттар суохтар, үлэһиттэр көрө-истэ сылдьар буоллахтарына, зоопаркаҕа кыараҕас сиргэ хаайтаран туруоҕунааҕар, көҥүлгэ сылдьыбыта ордук. Ulus.media cуруйарынан, кулун тутар 25 күнүгэр дирекция уонна институт үлэһиттэрэ айаҥҥа турунуохтаахтар.
Ангелина Васильева, “Саха сирэ” хаһыат, edersaas.ru