Дьааҥыга бу сайын булуллубут Бээчэ диэн тайах оҕото зоопаркаҕа кэлээри, “Полярные авиалинии” хампаанньа босхо көтүтэрин кэтэһэр.
edersaas.ru
Бу күннэргэ «Сахаэнерго» филиалын үлэһиттэрэ тайах кээмэйинэн мас килиэккэни тута сылдьаллар. «Орто дойду» зоопарк салалтата тайаҕы ыларга сөбүлэспитэ, ол эрээри тиэйэн аҕаларга үп-харчы тиийбэт. Ол иһин “Полярные авиалинии” хампаанньа салалтатын кытары кэпсэтии бара турар.
Санаттахха, билигин «Орто дойду» зоопаркаҕа икки тайах баар.
Ыспыраапка
Бу сайын Дьааҥы улууһун Бөтөҥкөс сэлиэнньэтин олохтоохторо Рожиннар ойуурга ийэтэ суох, саҥа төрөөбүт тайах оҕото сылдьарын булан ылбыттара. Кыылларын Бээчэ диэн ааттаабыттара.
Сайын, күһүн үүтүнэн, отунан, мас лабаатынан аһатан, Бээчэни улаатыннарбыттара. Ол эрээри улааппыт тайаҕы дьиэ кыылын курдук тутар кыаллыбатын өйдөөбүттэрэ. Оттон ойуурга ыытыахтарын – дьоҥҥо, дьиэ кыылларыгар убанан хаалан, кыайан сылдьыа суоҕа диэн сэрэхэдийбиттэрэ.
Ангелина Васильева, “Саха сирэ” хаһыат, edersaas.ru