Айылҕа харыстабыла

Бэҕэһээ өссө 16 баһаары умуруордулар

Бүгүҥҥү дааннайынан, Саха сиригэр 50 сиринэн ойуур баһаара бара турар. “Авиалесоохрана” иһитиннэрбитинэн, суукка иһигэр 22,3 тыһыынча гектар иэннээх сиринэн 16 баһаары умуруорбуттар.

Билиҥҥи туругунан, өрөспүүбүлүкэ үрдүнэн нэһилиэнньэлээх пууннарга кутталы үөскэтэр улахан баһаар суох. Нэһилиэктэртэн биир көстөөх сиринэн чугас сытар баһаардар Чурапчы, Бүлүү уонна Амма улуустарыгар бэлиэтэммиттэр. Сүрүн күүс билигин Уус Майа оройуонугар туһуламмыт. Манна баһаар алта сиринэн бара турар. Уоту умуруорууга 121 киһи, 16 тиэхиньикэ үлэлии сылдьар.

ЫБММ Саха сиринээҕи управлениетын салайааччыта Павел Гарин иһитиннэрбитинэн, өрөспүүбүлүкэҕэ билигин ойуур баһаардарыгар барыта 500 киһи, 85 тиэхиньикэ үлэлии сылдьар.

– Нэһилиэнньэлээх пууннары харыстааһыҥҥа туох баар үлэлэр барыта ыытыллан тураллар, онон билигин нэһилиэктэргэ уонна уот, гаас ситимнэрин курдук улахан эбийиэктэргэ баһаардар кутталы үөскэппэттэр. Бүлүү улууһун Күбэйиндэтигэр кутталы үөскэтиэх сирдэргэ ЫБММ исписэлиистэрэ тиийэн үлэлии сылдьаллар. Өрөспүүбүлүкэ сирин-уотун кэрийэн көрүүгэ 9 салгын тырааныспара (Ыксаллаах быһыыны-майгыны туоратыыга тэриллибит судаарыстыбаннай биир кэлим систиэмэтин тырааныспардара) үлэлээтэ. Бүгүн “Полярные авиалинии” тырааныспардара баһаары кэтээн көрүүгэ, умуруорууга үлэлиэхтэрэ, – диэн иһитиннэрэр Павел Сергеевич.

Аграфена КУЗЬМИНА.

0
0