Ленскэй оройуонун Бэчинчэ нэһилиэгэр “Аартык” тыа хаһаайыстыбатын потребительскэй кэпэрэтиибэ 120 ынахха анаммыт комплексы туттан үлэҕэ киллэрдэ.
edersaas.ru.
Комплекс аһыллыытын үөрүүлээх күнүгэр тыа хаһаайыстыбатын миниистирин бастакы солбуйааччы Татьяна Осипова, Ленскэй оройуон баһылыга Жумарт Абильманов, оройуон сэбиэтин дьокутааттара, нэһилиэк олохтоохторо сырыттылар.
“2012-2020 сс. тыа хаһаайыстыбатын сайдыытын уонна тыа хаһаайыстыбатын бородууксуйатын, ас-үөл ырыынагын сүрүннээһин” судаарыстыбаннай бырагыраама чэрчитинэн тутуллубут, аныгы ирдэбилгэ сөп түбэһэр, толору мэхэньисээссийэлээх комплекс 42 мөл. солк. сууммалаах, онтон 39 мөл. солк., эбэтэр 98,5 %-а бүддьүөттэн толуйуллуохтаах.
—Кэлиҥҥи сылларга өрөспүүбүлүкэҕэ 65 сүөһү иитэр комплекс тутулунна, — диэтэ Татьяна Осипова. – Ити барыта тыа сиригэр үлэни-хамнаһы тэрийэн дьону дохуоттаах оҥорорго, илии ыарахан үлэтин тиэхиньикэ күүһүнэн солбуйарга, оҥоһуллар бородууксуйаны элбэтэргэ итиэннэ хаачыстыбатын тупсарарга, нэһилиэнньэни экология өттүнэн ыраас, олохтоох аһынан хааччыйарга ананан тэриллэр.
Оройуон баһылыга Жумарт Абильманов кэлэр өттүгэр маннык комплекс Орто Наахараҕа тутулларын эттэ уонна Витим, Пеледуй бөһүөлэктэригэр үүт салаатын сөргүтэр былаан баарын билиһиннэрдэ.
2009 с. тэриллибит «Аартык» ТХПК Анджелика Новгородова салалтатынан үлэлиир. Күн бүгүн кэпэрэтиип 258 сүөһүлээх, ол иһигэр 137 ыанар ынах, 250 сылгыттан 104-дэ биэ. Быйылгы сыл уон ыйын устата баалабайынан 301 туонна үүт ыаммыт, 184 туонна туттарыллыбыт. Отучча сыллааҕыта тутуллубут эргэ хотоҥҥо үлэлээбит хаһаайыстыба үлэһиттэрэ туспа ыыр блоктаах аныгылыы хотоннонон үөрүүлэрэ улахан. “Аартык” кэпэрэтиип анал астыыр собуоттаах “Батамайдааҕы” кэпэрэтииби үүтүнэн хааччыйыахтаах.
Раиса Сибирякова, «Саха сирэ» хаһыат, edersaas.ru