Хабаровскайга Уһук Илиннээҕи медиафорумҥа бэчээттэнэн тахсар маассабай иһитиннэрэр-биллэрэр сириэстибэлэр инники дьылҕаларын туһунан киэҥ дьүүллэһии тахсыбыт. Хаһыат, телевидение, радио аудиторията 100 мөлүйүөнтэн тахса буоллаҕына, Арассыыйаҕа күн аайы бэчээттэнэр интернет-изданиелар аудиториялара 10 мөлүйүөн кэриҥэ буолара бэлиэтэниллибит. Бу туһунан «Московский комсомолец» хаһыат кылаабынай эрэдээктэрэ Павел Гусев медиафорумҥа ыйбыт.
Манна Японияҕа сарсыардааҥы хаһыаттар 8-10 мөлүйүөн тиражтаахтарын туһунан эмиэ этиллибит.
«РИИХ Сахамедиа» АУо генеральнай дириэктэрэ Кирилл Алексеев бу кэпсэтиигэ санаатын маннык үллэстибит:
—Ааҕааччылар кэтэһэр “Саха сирэ” уонна “Якутия” хаһыаттара билигин 110 тыһыынча экземплярынан тахсаллар. Бу хаһыаттар 2017 сылтан босхо тарҕатыллаллар. Итинник ньыманан биһиги тираж намтааһынын бохсубуппут. Хаһыаттарбыт интэриниэккэ былаһааккалаахтар, социальнай ситимнэригэр 110 тыһыынчаттан тахса сурутааччылаахтар. Биһиги ааҕааччы аудиториятын кэҥэтэн иһэр аныгы, элбэх хайысхалаах, мультимедийнай, мультиплатформеннай холдинг курдук сайдан иһэбит диэн сыаналыыбын.
Медиафорумҥа өрөспүүбүлүкэ суруналыыстара, блогердар, бырабыыталыстыба бэрэстэбиитэллэрэ, Саха сирин суруналыыстарын Сойууһун бэрэссэдээтэлэ Галина Бочкарева, Ил Дархан дьаhалтатын информационнай бэлиитикэҕэ департаменын салайааччы Роман Мандзяк, уо.д.а. кыттыбыттар.