Сүрүн Уопсастыба

«Бэчээт тиэргэнигэр» атын эрэгийиэннэр кытталлар

Атырдьах ыйын 26-27 күннэригэр “Куруһаала” атыы-эргиэн дьиэтигэр Саха АССР 100 сылыгар анаммыт “Бэчээт тиэргэнэ” норуоттар икки ардыларынааҕы быыстапка-дьаарбаҥка буола турар.

Манна өрөспүүбүлүкэ эрэ буолбакка, Уһук Илин эрэгийиэннэрин, Москва, Казахстан, Татарстан, Новосибирскай кинигэ кыһалара кытталлар. Холобур, Казахстантан “Фолиант”, Москваттан “Сфера”, “Дарь” кинигэ кыһалара, типографиялар бааллар. Быыстапка-дьаарбаҥка түмүгүнэн бастыҥнары быһаарыахтара.

Үөрүүлээх аһыллыытыгар вице-премьер Сергей Местников, СӨ инновацияларга, инфокоммуникационнай технологияларга, цифровой сайдыыга миниистирэ Анатолий Семенов кыттыыны ыллылар. Москва куорат бырабыыталыстыбатын издательскай бырагырааматын эспиэрэ, “Белый город” атыы дьиэтин генеральнай дириэктэрэ Константин Чеченев бочуоттаах ыалдьыт буолла.

Саха сирин “Бэчээтин тиэргэнэ” чахчы сөхтөрөр: оҥоһуллар тахсар бородууксуйа элбэҕин, интэриэһинэйин, хаачыстыбатын бэлиэтиэм этэ. Манна өрөспүүбүлүкэ бары муннуктарыттан эрэ буолбакка, атын эрэгийиэннэртэн, тас дойдуттан кытары кэлбиттэр. Онон кэлэр сылларга быыстапка-дьаарбаҥка бу курдук далааһыннаахтык ыытылла туруо диэн эрэнэбин, — диэн кини эттэ.

Москва бырабыыталыстыбата анал бырагырааманы, “Москва книжная” медиаэкспозицияны аҕалбыт. Манна кинигэлэри сүрэхтээһиннэр, оҕо суруйааччыта Анна Гончарованы кытары көрсүһүүлэр, бибилэтиэкэлэргэ кинигэлэри бэлэх биэрии, о.д.а. бэлиэ тэрээһиннэр буолуохтара.

11-с төгүлүн ыытыллар “Бэчээт тиэргэнэ” быыстапка-дьаарбаҥкаҕа маастар-кылаастар, аахсыйалар, саҥа кинигэлэри сүрэхтээһин, сурунааллар, хаһыаттар эрэдээксийэлэрэ билиһиннэрэр бырагыраамалара, квест-оонньуу, викториналар, куонкурустар, көрсүһүүлэр, суруйааччылардыын автограф-сессиялар, «төгүрүк остуол», “Сэргэй Баһылайап көмүс күһүнэ”, о.д.а. интэриэһинэй тэрээһиннэр буолаллар.

“Сахамедиа” холдинг быыстапка-дьаарбаҥка кэмигэр “Саха сирэ”, “Якутия” хаһыаттарга чэпчэтиилээх сурутууну, суруйтарбыт дьоҥҥо сүүйтэриитэ суох лотереяны биллэрдэ. Оттон “Саха сирэ” хаһыат эрэдээксийэтэ “Саха сирин» суруйааччы кыргыттара” диэн саҥа аахсыйаны уонна ааҕааччыларыгар анаан бэртээхэй бириистэрдээх викторинаны ыытта.

Ангелина Васильева, “Саха сирэ” хаһыат, edersaas.ru

Хаартыска: СИА.

0
0
Telegram Whatsapp