«Бэчээт тиэргэнэ-2017». Куонкуруска — 146 кинигэ

Ааптар: 
Бөлөххө киир:

Онус төгүлүн ыытыллар регионнар икки ардыларынааҕы быыстапка-дьаарбаҥка Дьокуускай куорат киинигэр, Ленин болуоссатыгар, икки күн тигинэччи үлэлээтэ. Түһүлгэҕэ уопсайа сүүрбэттэн тахса тэрилтэ, улуустартан, куораттан  хаһыаттар, кинигэ кыһалара, о.д.а. кытыннылар. 

edersaas.ru


Тэрээһин чэрчитинэн кинигэ атыыта-тутуута, түһүлгэҕэ ааптардары кытары көрсүһүүлэр, саҥа кинигэлэри, альбомнары билиһиннэриилэр, «Закон РС(Я) «Об обязательном экземпляре»: исполнение и проблемы» төгүрүк остуол, Саха сирэ Арассыыйаҕа холбоспута 385 сылыгар аналлаах кинигэ быыстапката, оҕолорго хоһоон ааҕыытыгар куонкурус, маастар-кылаастар, хаартыскаҕа түһүүлэр, о.д.а. киһини кэрэхсэтэр, сэргэхситэр тэрээһиннэр үрдүк таһымнаахтык ыытылыннылар.

Далааһыннаах тэрээһини түмүктүүр долгутуулаах күҥҥэ эҕэрдэ тыллар, баҕа санаалар этилиннилэр, ырыа ылланна, хоһоон ааҕылынна.

Саха норуодунай бэйиэтэ Наталья Харлампьева ааҕааччылары кытары чугастык алтыһар, көрсүһэр ураты кэрэ, истиҥ тэрээһиҥҥэ суруйааччылары ыҥыран түһүлгэҕэ олохтообуттарыгар тэрээһини сүрүннээччилэргэ махтанна. Саха дьонун тапталын ылбыт бэйиэт Иван Мигалкин кинигэни тарҕатар, ааҕыыга угуйар бар дьоҥҥо махтал тылларын анаата.  СӨ сибээскэ уонна информационнай технологияларга миниистири солбуйааччы Чокуур Гаврильев «Бэчээт тиэргэнин»  быйылгы куонкуруһугар 146 саҥа кинигэ киллэриллибитин эттэ. Аныгы тэтимнээхтик сайдар үйэҕэ кумааҕы кинигэ киһиэхэ син биир сүрүн оруолу ылара көстөрүн бэлиэтээтэ.

Кинигэ кэм-кэрдии, үйэ ситимэ. Онон кэнчээри ыччат манна болҕомтотун уурарыгар, ааҕыынан умсугуйарыгар баҕарабын«, — диэтэ. Ааҕар киһи — билиилээх, билиилээх киһи — сайдыылаах, сайдыылаах киһи хаһан баҕарар ситиһиилээх буоларын тоһоҕолоото.  Салгыы куонкуруска киллэриллибит үлэлэр бары сылтан сыл тупсан, киэркэйэн иһэллэрин, онон күөн күрэскэ эрбии тииһин курдук эгил-тэгил киирсии улаатарын СӨ суруйааччыларын Ассоциациятын бырабылыанньатын бэрэссэдээтэлэ Олег Сидоров эттэ.

Түмүккэ дохсун ытыс тыаһыгар доҕуһуоллатан, куонкуруска киллэриллибит, быйылгы сылга бастыҥынан ааттаммыт үлэлэри бэлиэтээһин буолла.  Ол курдук, дьүүллүүр сүбэ анал дипломнарынан  «Якутия медиа-холдинг» ААУо, «Бичик»  кинигэ кыһата, «Халыма долгуннара» хаһыат (Орто Халыма), «Көмүөл» издательство, «Амма олоҕо» хаһыат (Амма), о.д.а. наҕараадаланнылар.

«Дебют» анал аакка «Алаас» издательскай киин  «Детеныш мамонта» кинигэтинэн,  «Бичик»  кинигэ кыһата «Төрүт дорҕоон» кинигэтинэн тигистилэр.

«21-с үйэ учуобунньуга» номинацияны — «Спектр+»  «Олоҥхо дойдутун оҕотобун» кинигэтинэн(Бүлүү),  1 ст. дипломунан «Бичик»  кинигэ кыһата «Төрүт дьарык» 1-4 кылаас оҕолоругар аналлаах кинигэтинэн ыллылар.

Оҕоҕо уонна ыччакка аналлаах кинигэни бэчээттээн таһаарыыга — 3 ст.диплому «Бичик» «Алыптаах дойдуга» кинигэтин иһин, 2 ст.диплому «Хамсыыр харамай» кинигэнэн көрбөттөр өрөспүүбүлүкэтээҕи бибилэтиэкэлэрэ,  1 ст.диплому «Алаас» ИИТК оҕоҕо аналлаах энциклопедиятынан туттулар.

Альбому оҥорон таһаарыы иһин — «Эдьигээн сонуннара» хаһыат (Эдьигээн, «Сияние полярного круга» хаартысканан альбом), «Бичик» («Саха быһаҕа» кинигэ), «Алаас» ИИТК («Тохтоо, көмүс түгэн») дипломнарынан наҕараадаланнылар.

Электроннай бэчээккэ — 3 ст. диплом «Алаас» ИИТК, 2 ст. диплом көрбөттөр өрөспүүбүлүкэтээҕи бибилэтиэкэлэригэр «Саха сүүс бастыҥ литературнай айымньыта» кинигэтин иһин, 1 ст. диплом Уһук Илиҥҥи Федеральнай уокуругар СӨ бастайааннай бэрэстэбиитэлистибэтэ, Хабаровскай к. «Пути великих свершений» альбомун иһин туттарылыннылар.

Кыраайы үөрэтэр научнай-популярнай кинигэни бэчээттээн таһаарыы иһин 3 ст. дипломҥа «Бичик» («Образование в Амгинском улусе» кинигэ), 2 ст. дипломҥа СӨ суруйааччыларын Сойууһа («Кэм кэрдии уонна олоҕум»кинигэ), «Якутия медиа-холдинг» ААУо,  СӨ Судаарыстыбаннай мунньаҕа (Ил Түмэн) («Сахалыы бастакы хаһыаттар. Сурунааллар. Саха дойдута. Саха олоҕо. Саха Санаата.») тигистилэр.

Периодическай бэчээттээн таһаарыыларга 3 ст.дипломунан «Сахабэчээт» АУ («Время Арктики» сурунаал), 2 ст. — «Сахабэчээт» АУ («Далбар Хотун» сурунаал), «Кэскил» («Колокольчик» сурунаал) бэлиэтэннилэр.

Улуустарга бастыҥ кинигэҕэ 3 ст. диплом — «Хотугу кыым» хаһыат (Абый), 2 ст. диплом — «Таатта» хаһыат (Таатта), 1 ст. диплом «Үлэ күүһэ» (Горнай).

Бастыҥ художественнай киэргэтии уонна дизайн — 3 — «Якутия медиа-холдинг», 2 — «Сайдам» издательство ыллылар.

Саамай долгутуулаах уонна кэтэһиилээх «Сыл кинигэтэ» номинацияны «Бичик» национальнай кинигэ кыһата «Животные Якутии»  кинигэтинэн ылан үөрүү-көтүү өрөгөйө буолла.

Сардаана БАСНАЕВА, “Саха сирэ” хаһыат, edersaas.ru

Афанасий Ноев хаартыскаларга түһэриитэ.

 

+1
0
+1
0
+1
0
+1
0
+1
0
+1
0
+1
0