«Өймөкөөн» өрөспүүбүлүкэтээҕи айан суолун көрүүгэ-истиигэ эппиэттээх тэрилтэнэн СӨ Айан суолун управлениета буолар.
edersaas.ru
Бу күннэргэ улуус баһылыга Иннокентий Сивцев управление салайааччыта Семен Филипповы кытта көрсөн, суолталаах боппуруостары дьүүллэстэ. Баһылык бэлиэтииринэн, салайааччылар, бастатан туран, Куйдуһун үрэҕи туоруур муоста кыһалҕатын ырыттылар.
— Бу боппуруоска сайын СӨ тырааныспарын уонна суол хаһаайыстыбатын миниистирэ Владимир Сивцевтиин эмиэ кэпсэтэ сылдьыбытым. Биллэн турар, саҥа муостаны тутуу үбүлээһинэ кыаллыбат. Онон муостаны саҥардыы — тирээн турар боппуруос. Бу туһунан Семён Филипповы кытта сүбэлэһэн, муостаны саҥардыыга үп көрүллэн, эһиил тустаах үлэ барыаҕа. Авиапорт микрооройуонуттан Куйдуһуҥҥа диэри суолу сырдатыы боппуруоһун эмиэ көрдүбүт. Кэлэр сылга Томтор нэһилиэгин бу учаастагар лаампалардаах остуолбаны туруоран, сырдатыы үлэтэ быһаарыллыаҕа, — диэн улуус баһылыга Иннокентий Сивцев кэпсэтии түмүгүн билиһиннэрдэ.
Елена ПОТОЦКАЯ, «Саха сирэ» хаһыат, edersaas.ru