Бэҕэһээ — полковник, бүгүн — хаайыылаах: Николай Мамчурга суут бириигэбэрэ таҕыста
Бу хобдох дьыала 2016 сыл сааһыгар тэриллибитэ — СӨ ИДьМ-тын миниистирин солбуйааччынан — Силиэстийэлиир управление начаалынньыгынан үлэлии сылдьыбыт, полиция полковнига Николай Мамчур арыгы иһэн баран, бэйэтин үлэһитин күүһүлүү сатааһыҥҥа буруйдаммыта. Уһун-унньуктаах, сабыылаах эрэсииминэн ыытыллыбыт суут, дьэ, түмүктэнэн, үһүс сылыгар кэмниэ-кэнэҕэс бириигэбэр, дьэ, таҕыста.
Хайдах саҕаламмытай?
Сүрдээх куһаҕан уонна соһумар сонун 2016 сыл муус устар 19 күнүттэн тилийэ көппүтэ – ис дьыала миниистирин солбуйааччы – Силиэстийэлиир управление начальнига, полиция полковнига Николай Мамчур күүһүлүү сатааһыҥҥа уорбаланар уонна бэйэтигэр тиийинэ сатаата диэн.
Оттон кини ити быһылаан буолуо нэдиэлэ эрэ иннинэ, 2016 сыл муус устар 14 күнүгэр, биһиэхэ, суруналыыстарга пресс-конференция оҥорбута. Ыйытыыларга хоп курдук хоруйдаан, сэргэх бөҕө этэ. Ол пресс-конференцияҕа кини элбэх дьыала туһунан иһитиннэрбитэ. Итиэннэ буруйдаахтары булан накаастыырга куруук бэлэм, үлэ үөһүгэр сылдьар принципиальнай силиэдэбэтэл курдук өйдөбүлү үөскэппитэ. Онтубут баара, нэдиэлэ буолан баран, аны бэйэтэ холуобунай дьыалаҕа эриллибитэ! Буолаары буолан, куһаҕан ыстатыйанан!
Оччолорго РФ Силиэстийэлиир кэмитиэтин Саха сиринээҕи управлениетын салайааччытын сонуннары киэҥник тарҕатар ситимнэри кытта үлэҕэ старшай көмөлөһөөччүтэ Надежда Дворецкая иһитиннэрбитинэн, 2016 сыл муус устар 18 күнүгэр Силиэстийэлиир управлениеҕа Дьокуускай куорат олохтооҕо дьахтартан сайабылыанньа киирбит. Ис дьыала миниистирин солбуйааччы Николай Мамчуру “сылдьыһар” дьайыылары күүс өттүнэн оҥоруу иһин холуобунай эппиэккэ тардар туһунан. Итинник ис хоһоонноох матырыйааллар 2016 сыл муус устар 19 күнүгэр СӨ ИДьМ-тын Бэйэҕэ куттал суох буолуутун суһал чааһыттан эмиэ киирбиттэр.
Оттон Ис дьыала министиэристибэтэ Силиэстийэлиир управлениетын сотрудницатын араапарынан миниистири солбуйааччы Николай Мамчурга туһуланан сулууспанан бэрэбиэркэни ыыппыта. Бэрэбиэркэни анал хамыыһыйа тэриллэн ыыппыта. Онно ИДьМ Бэйэҕэ куттал буолуутун оперативниктара уонна Россия ИДьМ-тын Бэйэҕэ куттал суох буолуутун кылаабынай управлениетын бэрэстэбиитэллэрэ киирбиттэрэ. Бэрэбиэркэ матырыйааллара силиэстийэ уорганнарыгар бэриллибиттэрэ.
Туох буолбутай?
Ол саҕана барыллаан быһаарыынан, 2016 сыл муус устар 17 күнүгэр, түүн диэки, Мамчур кабинетыгар хонтуруоллуур-аһардар пууҥҥа (КПП) турар 24 саастаах үлэһитин кофе иһэргэ ыҥырбыт. Сулууспатын эбээһинэһин толоро сылдьар кыыс начальнигын ыҥырыытын быһа гыммакка, кабинекка кэлбит. Онуоха тойон кыыһы илиилэрин кэдэрги тутан, баттаҕыттан тардан, күүһүлүү сатаабытын, кыыс мүччү туттаран, куотан тахсыбыт. Сарсыныгар РФ СК Саха сиринээҕи управлениетыгар сайабылыанньа суруйбут.
2016 сыл муус устар 19 күнүгэр миниистири солбуйааччы кабинетыгар дьэҥдьиир оҥоһуллубут. Онтон дьиэтигэр буолбут дьэҥдьиир кэмигэр сейфэттэн 20 мөл. солк. дуу биитэр 2 мөл. солк. дуу булбуттарын туһунан иһитиннэрии баара да, ол туһунан кэлин туох да иһиллибэтэҕэ. Ити күн Мамчур үлэтиттэн уһулларга араапар суруйбут.
2016 сыл муус устар 20 күнүгэр Мамчур дьиэтигэр моонньугар травматическай бэстилиэтинэн ытынан, бэйэтигэр тиийинэ сатаабыт.
2016 сыл муус устар ый бүтүүтүгэр өрөспүүбүлүкэтээҕи 2 №-дээх балыыһаҕа эмтэнэ сытан, балыыһаттан күрээн, соҕуруу дойдутугар куоппут диэн буолбута. Онуоха баара, дьыала өссө тэриллэ илик, процессуальнай бэрэбиэркэ эрэ бара турар буолан, көҥүл киһи быһыытынан, силиэдэбэтэлгэ этэн-сэрэтэн баран барбыта биллибитэ.
Маннык дьаабы дьыала Россия Ис дьыалаҕа министиэристибэтиттэн улахан бэрэбиэркэ кэлбит кэмигэр буолбута дьону бэркиһэппитэ даҕаны, толкуйдаппыта даҕаны. Баҕар, соруйан сөп түбэһиннэрэн, уган биэрбиттэрэ буолуо диэччилэр бааллара. Биитэр тотон өлбүт тойон халлаан хабарҕатынан буолан, кэрээниттэн тахсыбыт да буолуон сөп диэн сабаҕалаабыттара.
Николай Мамчур СӨ ИДьМ-тын Слиэстийэлиир управление салайааччытынан 2014 сыл алтынньы ыйыгар анаммыта. Уопуттаах силиэдэбэтэл дииллэрэ.
Бириигэбэр
Үөһэ этиллибитин курдук, Дьокуускай куорат федеральнай суутугар бу холуобунай дьыала икки сылтан ордук кэм көрүллэн бүттэ. Суут мунньаҕа сабыылаах эрэсииминэн барбыта.
Суут силиэстийэтигэр Николай Мамчур 2016 сыл муус устар ыйыгар итирэн баран, постка турар үлэһитин кабинетыгар ыҥыран, күүһү туттан күүһүлүү сатаабыта дакаастаммыт. Кыыс утарылаһан, ол дьайыытын тиһэҕэр тиэрдибэтэх эрээри, син биир күүһү туттан, сексуальнай майгылаах атын дьайыылары эмиэ оҥорбут.
Суут кэмигэр Мамчур буруйун ончу билиммэтэх, эмсэҕэлээччи миигин баһааҕырдар, холуннарар, дьыала матырыйаалларыгар фальсификациялааһын баар диэн көрдөрүү биэрбит.
Ол эрэн, буруйа толору дакаастанан, суут кинини 5 сылга уопсай эрэсиимнээх холуонньаҕа көҥүлүн быһарга уурбут уонна званиетын быспыт.
Мамчуру суут саалатыттан тутан барбыттар.
Вера МАКАРОВА, «Саха сирэ» хаһыат, edersaas.ru
Хаартыска: ааптар түһэриитэ