Бэҕэһээ, муус устар 6 күнүгэр, «Триумф» успуорт уораҕайыгар кикбоксиҥҥа Арассыыйа чөмпүйэнээтин уонна күрэхтэһиитин үөрүүлээх арыллыыта буолла. Улахан хабааннаах күрэхтэһиилэри ыыппатаҕа ырааппыт «Триумф» кыттааччылары үөрэ көрүстэ.
СӨ Бырабыыталыстыбатын бэрэссэдээтэлин солбуйааччы Сергей Местников күрэхтэһиини аста.
— Чөмпүйэнээт уонна күрэхтэһии арыллыбытынан тэрээһин кыттыылаахтарын, өрөспүүбүлүкэ уонна дойду олохтоохторун эҕэрдэлиибин. 2019 сыллаахха СӨ Ил Дарханын көҕүлээһининэн, РФ кикбоксинын федерациятын мунньаҕар биһиги өрөспүүбүлүкэбит чөмпүйэнээти ыытар баҕалааҕын туһунан сайаапка түһэрбитэ. Өрөспүүбүлүкэ кикбоксиҥҥа улахан болҕомтону уурарын көрөн, сайаапкаҕа сөбүлэҥнэрин биэрбиттэрэ. 30 сыл анараа өттүгэр Александр Иванов ССРС спортсменнарыттан бастакынан аан дойду чөмпүйүөнэ буолары ситиспитэ. Бу кыайыы саха уонна Арассыыйа спортсменнарыгар элбэх эрэли, кыаҕы үөскэппитэ. Ол иһин да бүгүн манна Дьокуускайга мустан турдахпыт, — диэн Сергей Васильевич тыл эттэ.
Сергей Местников «кикбоксинг сайдыытыгар уонна өрөспүүбүлүкэ успуордугар өр сыллаах үтүө үлэтин иһин» СӨ Ил Дарханын грамотатын СӨ кикбоксинын федерациятын вице-бэрэсидьиэнигэп, Саха АССР үтүөлээх тириэньэригэр, ССРС успуордун маастарыгар Александр Михайловка туттарда. «Гражданскай килбиэн» бэлиэнэн РФ кикбоксинын федерациятын вице-бэрэсидьиэнэ, РФ үтүөлээх тириэньэрэ Александр Березкин наҕараадаланна. СӨ Ил Дарханын махтал суругун СӨ сүүмэрдэммит хамаандатын сүрүн тириэньэрэ, РФ үтүөлээх маастара, кикбоксиҥҥа Аан дойду түөрт төгүллээх чөмпүйүөнэ Оксана Васильева уонна СӨ сүүмэрдэммит хамаандатын тириэньэрэ, РФ үтүөлээх маастара, норуоттар икки ардыларынааҕы кылаастаах успуорт маастара, аан дойду икки төгүллээх чөмпүйүөнэ Василий Васильев туттулар.
«Триумф» саалата Федерация Сэбиэтин аграрнай-продовольственнай бэлиитикэ уонна айылҕаны туһаныы кэмитиэтин бэрэссэдээтэлин солбуйааччы Егор Борисовы сылаастык көрүстэ. Онуоха Егор Афанасьевич тыла өһүллэн, санаабыт санаатын хото эттэ:
— Уон сыл устата өрөспүүбүлүкэ кикбоксиҥын федерациятын салайбыт киһи буоларым быһыытынан маннык улахан тэрээһин ыытылла турарыттан ис сүрэхпиттэн үөрэн турабын. Оччолорго саха уолаттара дойдуга, Европаҕа, аан дойдуга ситиһии көтөллөнөн кэлбиттэрин туоһута, ону таһынан тэрийээччитэ буоларым быһыытынан киэн туттабын, – диэн сахалыы тылынан эппитин көрөөччү үөрэ иһиттэ.
РФ кикбоксинын федерациятын вице-бэрэсидьиэнэ Александр Березкин: «Уһук Илиҥҥэ аан бастакытын кикбоксиҥҥа дойду чөмпүйэнээтэ мин төрөөбүт дойдубар, Саха сиригэр ыытыллан эрэриттэн тус бэйэм олус үөрэбин», — диэн эттэ.
Виктория Бястинова, edersaas.ru саайт, «Саха сирэ» хаһыат.
Хаартыска ysia.ru