СӨ Ил Дархана Айсен Николаев ыам ыйын 26 күнүнээҕи туругунан иһитиннэрбитинэн, бэҕэһээ 88 киһи ыалдьыбыт.
edersaas.ru
Итинтэн 67 киһи – Дьокуускайга, 9 киһи – Намҥа итиэннэ Алдаҥҥа, Мииринэйгэ вахтовиктар диэн эттэ. Онон Саха сиригэр, уопсайа, 1445 киһи ыалдьыбыта бэлиэтэммит. Балыыһаттан 594 киһи үтүөрэн тахсыбыт.
Ил Дархан өрөспүүбүлүкэ лабораторияларыгар суукка устата 2500-4000 тест оҥороллор диэтэ. Ити 100 тыһыынча нэһилиэнньэҕэ 331 тест оҥорорго тэҥнэһэр, дойду үрдүнэн үчүгэй көрдөрүү диэн быһаарда. Бу дьон ыалдьыбытын эрдэ билэргэ көмөлөөх диэн ыйда. Ол эрээри, 11 киһи ыарахан туруктаах балыыһаҕа сытарын иһитиннэрдэ. Биир киһи ИВЛ холбоммутун эттэ.
“Дьокуускай куоракка балаһыанньа барыбытын долгутар. Ыстатыыстыканы ылан көрдөххө, 1445 киһиттэн 1103 куорат олохтооҕо. Дьокуускай куоракка балаһыанньа оннун була илигинэ өрөспүүбүлүкэ үрдүнэн сымнатыыны биллэрэр табыллыбат. Хас биирдии олохтоох, тэрилтэ салайааччыта санитарнай-эпидемиологическай ирдэбили өйдүөхтээх, тутуһуохтаах. Куорат салалтатын көрдөһүүтүнэн оҥоһуллубут кыралаан сымнатыы (биирдиилээн салгын сиэһин, спордунан дьарыктаныы, паарка аһыллыыта) хомойуох иһин, дьон ирдэбили тутуспатыттан – тэйиччи сылдьыбатыттан, маасканы кэппэтиттэн кэдэрги түмүктээх. Хас биирдии киһи чугас киһитин туһугар эппиэтинэстээхтик сыһыаннаһыахтаах. Ирдэбили кытаанахтык тутустахпытына эрэ балаһыанньа тупсар кыахтаах”, — диэн быһаарда.
Ону таһынан, атыыһыттар мааскалаах, бэрчээккилээх сылдьыыны тутуспаттар диэн үгүс киһи үҥсэрин, онон суһал штаб үлэһиттэригэр маннык түгэннэри бэрэбиэркэлииллэригэр сорудахтаабытын иһитиннэрдэ. Итиэннэ борокуруору кытта кэпсэппиттэрин, маннык түгэннэргэ кинилэр дьайыылара эмиэ наадатын эттэ. Роспотребнадзор үҥсүү киирэр түгэнигэр ыарыы салҕыы тарҕамматын туһугар саамай кытаанах, атыы тустаах миэстэтин быстах кэмҥэ сабар даҕаны миэрэни ылыахтарыгар эрэллээҕин иһитиннэрдэ.
Людмила ПОПОВА, “Саха сирэ” хаһыат, edersaas.ru