Бе-200 салгын аала суһаллык Мииринэй Арыылааҕар баһаары умуллара көттө

Ааптар: Эдэр Саас

Бөлөххө киир:

РФ ЫБММ ВСУ МИ-8 бөртөлүөтэ, маны сэргэ, Дьокуускайтан БЕ-200 салгын аала Мииринэй оройуонугар Арыылаах сэлиэнньэтигэр баһаары умуллара суһаллык көттүлэр. Анал тиэхиньикэ, Мииринэйтэн подразделение ыытылыннылар.

—Оройуоҥҥа баазаламмыт бары наадалаах күүстэр бөһүөлэккэ ыытылыннылар, — диэтэ СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников.

Баһаар от ыйын 27 күнүгэр 22.00 чаас саҕана булуллубут. Бүгүн 13:45 ч. баһаар уота үөһээнэн барбыт уонна Аччыгый Ботуобуйа нөҥүө быраҕыллыбыт. 17:00 чаастааҕы иһитиннэриинэн өрүс кытыытыгар баар биэс дьиэ (үс дьиэ, икки тутуу) уокка былдьаммыт.

Сэлиэнньэ таһыгар баар «Орленок» оҕо доруобуйатын чэбдигирдэр лааҕыртан 230 оҕону уонна үлэһиттэри эвакуациялаабыттар. Чугастааҕы кэмҥэ оҕолор бука бары «Кимберлит» успуорт дыбарыаһыгар кэлиэхтэрэ. Мииринэй оройуонун уонна да атын улуустар нэһилиэктэриттэн кэлбит оҕолор Мииринэйдээҕи региональнай тэхиньиичэскэй кэллиэс (МРТК) уопсайыгар түһүөхтэрэ. Дьону эвакуациялыырга Мииринэйтэн оптуобус ыыппыттар.

Уоту утары 35 киһи, 10 уу баһар массыына, 5 баһаарынай массыына, икки булдьозер, ВСУ бөртөлүөтэ үлэлииллэр. АЛРОСА икки БЕЛАЗ-ы ыыппыт.

Арыылаахха 1800 киһи олорор. Бөһүөлэк дьиэлэрэ мастан тутуллубуттар, элбэх кыбартыыралаах дьиэ, аҕыс уулусса уонна Чон аатынан быстах туора уулусса баар. Эмсэҕэлээбит суох. Чугастааҕы лааҕырдартан оҕолору эвакуациялаабыттар. Билигин сэлиэнньэ олохтоохторун көһөрүүгэ үлэ бара турар.

Сэлиэнньэҕэ ыксаллаах быһыы-майгы үөскээн, уоту умуруорууга уу баһар массыыналарынан АЛРОСА көмөлөспүт. Маны сэргэ, хампаанньа дьону эвакуациялыырга оптуобустары биэрбит. Баһаар буола турар сиригэр АЛРОСА авиахампаанньатын МИ-8 бөртөлүөтэ ыытыллыбыт. Уоту утары охсуһууга хампаанньа үлэһиттэрэ эмиэ көмөлөһөллөр.