Бу күннэргэ маҕаһыын аайы ас-үөл, бэлэх атыылаһыытын сүпсүлгэниттэн болҕомтолоох да киһи тугу барытын «умнар» кэмэ.
edersaas.ru
Ол эрээри ордук ас өттүгэр болҕомтону туһаайыахха наадатын бэйэм холобурбунан сэрэтээри гынабын. Куорат киинигэр үлэлиир сирбиттэн чугаһыттан, хаһан буоларын курдук, «В десятку» маҕаһыыҥҥа киирэн, салаакка туттар фрукта ас кэнсиэрбэлэрин көрө сылдьан, биир бааҥкаҕа баттах «уста» сылдьарыгар хараҕым хатанна.
Соһуйан каассаҕа олорор кыыска тиийэн көрдөрөн баран: «Бу баттах дуо?» — диэн ыйыппыппар: «Баттах…», — диэн сүрдээх холкутук унаарытан кэбистэ. Мин бааҥканы ылан каасса иннигэр ууран кэбиһиэ дии санаабытым да, кыыһым аахайбата.
— Бу бааҥканы атыыттан таһаарбаккыт дуо? Табаар быһыытынан барбат буоллаҕа, — диэбиппэр атыыһыт: «Биһиги оҥорон таһаарбатах табаарбытыгар тоҕо эппиэттиэхтээхпитий?» — диэн хардарда.
— Оччоҕо мин хаартыскаҕа түһэрэбин дуо? Суруналыыспын. Дьону сэрэтэн матырыйаал оҥоруом, — диэн көҥүллэттим. «Баһаалыста…», — диэн кассир эмиэ унаарытан кээстэ.
Дьэ, онон бу маннык саатар аһа таска көстө сылдьар кэнсиэрбэлэри сэрэхтээхтик көрөн ылыҥ. Баттах, үөн-көйүүр, тоһоҕо да сылдьар буоллаҕына көҥүлэ…
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.