Сунтаар улууһугар ыытыллыбыт СӨ толорор былааһын отчуотун кэмигэр олохтоохтор түгэнинэн туһанан, араас хабааннаах ыйытыылары биэрдилэр, долгутар боппуруостарын туруорустулар.
Анивера Акимова, «Саха сирэ» хаһыат, https://edersaas.ru
Уһук Илин гектар, иһэр уу, оттуур ходуһалар, оскуола, оҕо саадын тутуу, быраастар тиийбэттэрин тула кэпсэтии нэһилиэк ахсын таҕыста. Кутана олохтооҕо Валентина Дьячковская: «Төрөөбүт тылбыт симэлийэр, сүтэр суолга үктэннэ. Хас даҕаны сыллааҕыта Дьокуускайга олоҥхоҕо туһуламмыт мунньахха тыаттан кэлэ сылдьар кырдьаҕаһы нууччалыы саҥар диэн модьуйбуттарын сөбүлээбэтэҕим. Оннук буолуо суохтаах. Иккиһинэн, Саха араадьыйатыгар Дапсы ыытар биэриитин бириэмэтэ олус кылгас. Ити солуута суох реклама, ырыа оннугар сахалыы тыыннаах биэриилэри элбэтиэххэ баара»,- диэн санаатын үллэһиннэ. Ити сөптөөх туруорсуу. Кырдьык, кэлиҥҥи кэмҥэ сахабыт тыла муннукка анньыллан эрэрин бары билэ-көрө сылдьабыт. Оттон Күүкэй олохтооҕо Мария Николаева Батсааптан арахсан, «Саха сирэ» хаһыаттан кырдьыктаах иһитиннэриилэри ааҕар, билэр буоллубут диэн бырабыыталыстыба чилиэннэригэр кэпсээтэ.
Анивера Акимова, «Саха сирэ» хаһыат, https://edersaas.ru