«Уран тыл оһуора» түмсүү батсаапка баар бары түмсүүлэртэн ураты. Манна хоһоонунан кэпсэтии сүрүн оруолга турар.
edersaas.ru, Сарыалыйа
Икки ый устата сир диэн планетаҕа олорооччуларга хаһан да түүйбэтэх вируспут сабардаан, көрсүһэн түмсүү тохтоото, бүддьүөт тэрилтэлэртэн уратыларга үлэбит тохтоото. Төһө да маннык ыарахан санаалаах санаа түһүү кэмигэр, салайааччыбыт Раиса Николаевна көмөтүнэн дойдубутугар буола турар бары тэрээһиннэргэ кытта сылдьабыт. Хоруона вируһун утаран, тохтууругар көрдөһөн, хоһоон суруйан үллэстибиппит. Улуу Кыайыы 75 сылыгар саамай тэрээһиннээх, көхтөөх бөлөх буоллубут. Сэриигэ кыттыбыт аҕаларбытын,тыылга үлэлээбит ийэлэрбитин, аймахтарбытын үйэтитэн кинигэ таҕыста. Мелодист Алексей Потаповтыын биир бырайыакка үлэлэһэн, хоһооннорбутун араадьыйаҕа ааҕарга анаан уһултаран, музыкальнай киэргэтиитин оҥотторон, бары ситиминэн тарҕаттыбыт, «Виктория» араадьыйаҕа таҕыстыбыт. Амма көмүскэлигэр, СӨ народнай артыыһа Марфа Расторгуева 70 сааһыгар, библиотека үлэһиттэрин тэрээһинигэр онлайн кытынныбыт. Аны үлэ, эйэ, маай бырааһынньыгар анаан кинигэ бэлэмнээһинигэр салайааччыбыт сүүрэ-көтө сылдьар. Онон хамсааһыны таһаарааччы, көҕүлээччи, салайааччыбыт Раиса Николаевна Тимофеева- Михайловаҕа махтанан туран, үчүгэйи ыралаан, түстээн,олоҕу кытта тэҥҥэ хаамсабыт, история страницатыгар эмиэ сонун кылааты киллэрэбит.
Сарыалыйа, edersaas.ru