Бу күннэргэ Уус Алдан Бороҕонугар буола турар спартакиаданы «Саха» НКИХ үлэһиттэрин улахан бөлөҕө сырдата сылдьар.
«Тэтим» араадьыйа суруналыыстара чаас буола-буола интэриэһинэй сонуннары биэрэ тураллар. Соторутааҕыта араадьыйа кэрэспэдьиэнэ Альбина Тарабукина бүгүн Бороҕоҥҥо буолбут улахан ардахтаах буурҕа түспүтүгэр дьон эчэйиитин туһунан социальнай ситимнэргэ олоҕо суох араас сурах тарҕанарын туһунан кэпсээбитэ. Кырдьык, батсаап ситимэ аһара омуннаан күүркэтэрэ баар суол. Бу чааска араадьыйа суруналыыһа СӨ доруобуйа харыстабылын миниистирин солбуйааччы Любовь Бурнашеваны устуудьуйаҕа ыҥыран, билиҥҥи балаһыанньаны билиһиннэрэригэр көрдөстө.
— Бу бириэмэҕэ эчэйбит киһи ахсаана 19, ол иһигэр 3-һэ оҕо. Бары эчэйиилэрэ арааһынай. 7 киһи доруобуйатын толору чинчиттэрэн баран, дьиэлэригэр тарҕастылар. Онтон хаалбыт дьон доруобуйаларын салгыы көрөбүт-истэбит. Биһиги маннык улахан тэрээһиҥҥэ эрдэттэн бэлэм олоробут. Ол курдук, улахан дьоҥҥо 2 №-дээх өрөспүүбүлүкэтээҕи балыыһаҕа, оҕолорго Национальнай мэдиссиинэ киинигэр эбии куойкалар бэлэмнэр. Маны таһынан, суһал түгэҥҥэ санрейстэр эмиэ көтөллөр. Онон спортивнай күрэхтэһиилэргэ кыттар спортсменнар туруктарын уопуттаах быраастар кэтээн көрө сылдьаллар, — диэн Любовь Бурнашева эмчиттэр балаһыанньаны миэстэтигэр тутан олороллорун туһунан «Тэтим» араадьыйаҕа быһа холбонууга кэпсээтэ.
Онон, доҕоттор, батсаап күүркэтэр ситимигэр буолбакка, «Сахамедиа» холдинг «Эдэр саас» уонна СИА саайтарын уонна «Саха» НКИХ «Тэтим» араадьыйатын уонна тэлэбиидэнньэтин биэриилэрин итэҕэйиҥ, ааҕыҥ, көрүҥ, истиҥ.
Елена ПОТОЦКАЯ, «Саха сирэ» хаһыат.