Бэрээдэк Уопсастыба

Батсаабынан «порнуханы» тарҕаппыт

Социальнай ситимнэр уорганнар кэтэбиллэригэр сылдьалларын бары билэбит. Онон, маннык ситимнэргэ сокуону кэһии таҕыстаҕына, буруйдаах киһи оҥорбутугар эппиэттиэн сөп.

edersaas.ru


Дьокуускай куорат 35 саастаах олохтооҕо оннук быһыыланан, суут иннигэр эппиэттээбитин туһунан СӨ Борокуратууратын пресс-сулууспата иһитиннэрдэ.

Ол курдук, суут быһаарбытынан, бу эдэр дьахтар быйыл саас, олунньу 2 күнүттэн 5 күнүгэр диэри кэмҥэ, батсаап биир бөлөҕөр 42 видеофайл ыыппыт. Онтуката барыта порнографическай ис хоһоонноохтор эбит.

Дьахтар бу дьайыылара РФ Холуобунай кодексатын 242-с ыст. 3-с чааһын «б» пуунугар сөп түбэспиттэр. Ол эбэтэр, информационнай-телекоммуникационнай ситими туһанан, порнографическай матырыйааллары сокуоннайа суохтук тарҕатыы.

Суут мунньаҕар дьахтар буруйун билиммит. Уонна дьыалатын суут силиэстийэтигэр көрбөккө эрэ бириигэбэр таһаарар туһунан дознание бүтүүтүгэр киллэриллибит хадатаайыстыбаны өйөөбүт.

Суут кини буруйун билиммитин, кэмсиммитин, урут сууттана сылдьыбатаҕын, кыра саастаах оҕолооҕун, үчүгэй характеристикалааҕын учуоттаан, бу ыстатыйанан көрүллэр накаастабыл миэрэттэн кыратын, сымнаҕаһы анаабыт — 15 тыһ. солк. ыстараап төлүүргэ уурбут.

Вера МАКАРОВА, «Саха сирэ» хаһыат, edersaas.ru

Хаартыска: интэриниэттэн.

3
0

Добавить комментарий