Маны аах Тыа хаһаайыстыбата

Батамайдааҕы астыыр сыах сотору маҥнайгы сыырдарын таһаарыаҕа

Ленскэй улууһугар «Батамайдааҕы» ХЭТ үүтү астыыр сыаҕа тиргиччи үлэлиир.

edersaas.ru.

Манна үүт, суорат, чөчөгөй, сүөгэй уонна бородууксуйа саҥа көрүҥэ – сымнаҕас сыыр астанар. Бэйэ оҥорбут сибиэһэй аһа-үөлэ маҕаһыыннарга батарыллар уонна социальнай тэрилтэлэргэ ыытыллар. Сыыры оҥорууну асчыттар бэс ыйын 1 күнүттэн саҕалаабыттара. Онон билигин камераҕа хас күн ахсын 100 киилэ кытаанах аҥардаах сыыр угуллар, 45 хонугунан ситэн бэлэм сыр буолар. Онон улуус олохтоохторо сыыры от ыйын 15 күнүттэн амсайар кыахтаныахтара.

Санатан эттэххэ, компьютернай технологиянан салайыллар саҥа сыах улуус дьаһалтатын көмөтүнэн тутуллан олоххо киирдэ. ХЭТ салалтата каадыры үүннэриигэ, үлэһиттэр идэлэрин үрдэтиигэ улахан болҕомтотун уурар. Сыры оҥорооччу Наталья Корнилова СГТХА-ны бүтэриэҕиттэн 12 сыл «Өлүөхүмэ кыладабыайа» ХЭТ астыыр кэмбинээтигэр үлэлээбитэ, онон улахан уопуттаах технолог. Билигин камераҕа укпут сыырдарын долгуйа кэтэһэр. Камераҕа араас кээмэйдэх:улахан, орто, кыра сыырдар угуллан тураллар.

– Бастаан сыыры алта чаас устата оргутабыт, онтон рассолга сытыарабыт, салгыы сыыр камератыгар угабыт. Күн ахсын көрөбүт-истэбит, эргитэбит, бастакы сыырдарбыт от ыйын 15 күнүгэр тахсыахтаахтар, – диэн Наталья Корнилова долгуйа кэпсиир. – Күн ахсын 100 киилэ сыыры угабыт, онно 1 туонна кэриҥэ үүт барар. Күн бүгүн камераҕа 2 туонна сыыр баар.

Хаһаайыстыба Батамайдааҕы салаатын управляющайа Иван Сергеев этэринэн, саҥа технологиянан, ол иһигэр улахан кыамталаах пастеризаторынан, сэбилэнэммит үүппүт хаачыстыбата биллэрдик тупсубут. Билигин кэлэктиипкэ 50 киһи үлэлии сылдьар. Саҥа астыыр сыах кыамтата 60-70 % туһаныллар, күҥҥэ 3 туонна үүт астанар. Билигин хаһаайыстыба салалтата сырьену элбэтэр туһугар үлэлиир, түбүгэ элбэх: быйыл Архангельскайтан 100 холмогор боруода ынах аҕалыллыахтаах итиэннэ саҥа хотон тутуллуохтаах диэн улуус дьаһалтатын пресс-сулууспата кэпсиир.

Раиса Сибирякова, «Саха сирэ» edersaas.ru

0
0