“Сыл бастыҥ дьиэ кэргэнэ” куонкурус 15-с төгүлүн ыытылынна. Быйылгы куонкуруска Ил Дархан Егор Борисов уон кыайыылаах дьиэ кэргэҥҥэ 300 тыһ. солкуобайдаах бириэмийэтин туттарда.
Егор Афанасьевич дьон киэн туттар, холобур ылар, бастыҥ ыаллары ааттаталаата. Мархаттан 16 оҕону ииппит Тарабукиннары, 2009 сыллаахха Россия бэрэсидьиэниттэн “Төрөппүт албан аата” уордьаны туппут Максимовтары, Тополинайтан аан дойду хас да төгүллээх чөмпүйүөнүн улаатыннарбыт Лебедевтэри бэлиэтээтэ.
Кини: “Дьиэ кэргэн – уопсастыба төрүтэ, кини оруола туохха да тэҥнэспэт. Бастыҥ ыаллар талааннарынан, олоххо тардыһыыларынан, күүстээх санааларынан, үгүс ситиһиилэринэн сөхтөрөллөр. Онон биһиги дьиэ кэргэттэри өйүүргэ бары кыаҕы туһаныахтаахпыт. Билиҥҥитэ өрөспүүбүлүкэҕэ 258 дьиэ кэргэн баар. Сыл аайы 8 тыһыынча ыал үөскүүр, дьиэ кэргэн ахсаана эбиллэ турар. Кинилэргэ биһиги болҕомтобут уҕараабат. Бу маннык бигэ туруктаах ыаллар эдэрдэргэ үтүө холобуру көрдөрөллөр,” — диэн эттэ.
Саха сиригэр “Сыл бастыҥ дьиэ кэргэнэ” куонкурус уонтан тахса сыл устата тэриллэр буоллаҕына, Россияҕа быйыл саҥа ыытылынна. Манна Саха сирин уопутун туһаммыттара. Дойду араас муннугуттан барыта 294 дьиэ кэргэн кыттыбыта. “Россия кыһыл көмүс дьиэ кэргэнэ” номинацияҕа Хатастан Иван, Аксинья Жирковтар кыайбыттара.
“Сыл бастыҥ дьиэ кэргэнэ” Бүтүн Россиятааҕы куонкурус тэрийэр кэмитиэтин бэрэссэдээтэлэ Марина Гордеева бу киэһэ бастыҥ ыаллары видео нөҥүө эҕэрдэлээтэ. Кини Саха сиринээҕи куонкурустан саҕыллан, дойду үрдүнэн ыытыллар буолбутун бэлиэтээтэ.
Быйылгы өрөспүүбүлүкэтээҕи куонкурус түмүгэр хас да туспа кыа куонкурустар кыайыылаахтара кэлэн кытыннылар. “Көс ыал” куонкурус кыайыылаахтара Октябрина, Федор Протопоповтар (Томпо), “Эдэр ыал” – Екатерина, Гаврил Вырдылиннар (Таатта) уонна Саргылаана, Владислав Сивцевтэр (Амма), “Тыа сирин ыала” – Ньургуйаана, Иннокентий Ивановтар (Нам) уонна Мария, Василий Орлосовтар (Бүлүү), “Куорат ыала” – Софья, Иннокентий Акимовтар (Бүлүү) уонна Светлана, Сергей Граурдар (Мииринэй), “Эппиэтинэстээх төрөппүт” – Пелагея, Михаил Корниловтар (Дьокуускай), “Спортивнай ыал” – Фекла, Семен Аммосовтар (Мэҥэ Хаҥалас) уонна Мира, Николай Романовтар (Мэҥэ Хаҥалас) ыллаан-туойан, үҥкүүлээн, дьоҕурдарын арыйан, аныгы дьиэ кэргэн тугунан тыынан олорорун көрдөрдүлэр.
Кинилэр бу киэһэ Ил Дархан 300 тыһ. солкуобайдаах бириэмийэтин тутан, үөрдүлэр-көттүлэр.
Ангелина ВАСИЛЬЕВА.
Александр Назаров хаартыскаҕа түһэриилэрэ.