Дьокуускайга “Сыл бастыҥ дьиэ кэргэнэ” бэстибээл түмүгүн таһааран, кыайыылаахтарга Ил Дархан бириэмийэтин туттардылар.
“Сыл бастыҥ дьиэ кэргэнэ” өрөспүүбүлүкэтээҕи бэстибээл 2002 сылтан ыытыллар. Бу кэмтэн 160 бастыҥ ыалы бэлиэтээбиттэрэ.
Өрөспүүбүлүкэтээҕи бэстибээл уопутун сэргээн, дойду таһымыгар таһааран, иккис сылын “Сыл дьиэ кэргэнэ” Бүтүн Арассыыйатааҕы куонкурус ыытыллар. Бу куонкуруска Саха сириттэн икки ыал баран бастаан кэлбиттэрэ.
Сыл устата уон куонкурус ыытыллар. Бу куонкурус кыайыылаахтара бары түмүктүүр киэһэҕэ кэлэн бириэмийэни туталлар. Онон биир кыайыылаах диэн суох. Ону тэҥэ, сорох куонкурустар илин эҥээр уонна Бүлүү умнаһын улуустарыгар иккитэ ыытыллаллар.
Бу сырыыга араас улуустартан уон ыал кэлэн кытынна уонна 300 тыһ. солк. суумалаах Ил Дархан бириэмийэтин тутта. Кинилэр ааттара бу баар:
“Бастыҥ спортивнай дьиэ кэргэн” – Вероника Викторовна уонна Игорь Егорович Николаевтар (Амма сэл.);
“Бастыҥ куорат ыала” — Елена Витальевна уонна Евгений Николаевич Дворниковтар (Жатай бөһ., Дьокуускай);
“Бастыҥ куорат ыала” – “Удьуор утум” (хас да көлүөнэни түмпүт ыал) аатын ылбыт Күннэй Агитовна уонна Денис Петрович Хабаровтар (Тулагы сэл., Дьокуускай);
“Бастыҥ тыа сирин ыала” – Ньургуйаана Семеновна уонна Афанасий Юрьевич Прокопьевтар (Бүтэйдээх с., Мэҥэ Хаҥалас);
“Бастыҥ тыа сирин ыала” — Людмила Васильевна уонна Владислав Валерьевич Васильевтар (Күндэйэ с., Сунтаар);
“Бастыҥ эдэр ыал” — Октябрина Никитична уонна Александр Сергеевич Кулешовтар (Дойдуунускай нэһ., Мэҥэ Хаҥалас);
“Бастыҥ эдэр ыал” Юлия Сергеевна уонна Ярослав Валерьевич Филипповтар (Сунтаар сэл.,);
“Эппиэтинэстээх төрөппүт» — Наталия Петровна Ворошнина (Алдан к.);
“Бастыҥ тыа сирин ыала” – “Удьуор утум” аатын ылбыт Екатерина Алексеевна уонна Николай Гаврильевич Кычкиннар (Аллараа Бэстээх, Мэҥэ Хаҥалас);
“Бастыҥ көс ыал” — Антонина Николаевна уонна Дмитрий Гаврильевич Голиковтар (Тополинай с., Томпо).
Бэстибээл кыттыылаахтара, чахчы да, куонкурус кыайыылаахтара буолаллара биллэр: бары да, эчи, кыраһыабайдарын, талааннаахтарын, кыайыыга дьулуурдаахтарын! Кинилэри киһи көрө-көрө үөрэр. Чахчы да, холобур ылыаххын, кинилэргэ тэҥнэһиэххин баҕараҕын…
Кыайыылаахтары бырабыыталыстыба бэрэссэдээтэлин солбуйааччы Михаил Гуляев истиҥник эҕэрдэлээтэ.
“Дьиэ кэргэн – судаарыстыба төрүтэ” диэн уот харахха этиллэр. Төһө да кэм-кэрдии уларыйбытын иһин, дьиэ кэргэн сыаннастара: таптал, аҕам дьону ытыктааһын, оҕолору бүөбэйдээһин, о.д.а. уларыйбаттар. Сыл аайы өрөспүүбүлүкэ араас муннуктарыттан кэлэн кыттар бастыҥ ыаллар биһигини талааннарынан, ситиһиилэринэн, бэйэ-бэйэлэригэр истиҥ, сылаас сыһыаннарынан, санааларын күүһүнэн сөхтөрөллөр”, — диэн Михаил Гуляев бэлиэтээтэ.
Элбэх оҕолоох дьиэ кэргэттэри өйөөһүн судаарыстыбаннай бэлиитикэ биир өрө тутуллар хайысхатынан буолар. Онно сыллата өрөспүүбүлүкэ бүддьүөтүттэн 7 миллиард солк. көрүллэр. Бу бэлиитикэ инникитин да салҕанан барар. Кэлэр сылтан эдэр ыаллары өйөөһүн миэрэлэрэ олоххо киириэхтээхтэр.
Ангелина ВАСИЛЬЕВА, «Саха сирэ» хаһыат, edersaas.ru
Андрей Сорокин (СИА) түһэриилэрэ.