Саха киһитэ сылгылаах, сылгыта сыарҕалаах, сыарҕата толору буолуохтаах. Сунтаар улууһугар иккис сылын сылгыһыттар күннэрин көрсө сылгыһыттар күрэхтэрэ тэриллэр. Быйылгы күрэх Тойбохойго ыытылынна. Евгений Алексеев — кырдьаҕас сылгыһыт чугас атаһын аатынан тэриллэр күрэххэ анаан-минээн көрө-истэ Уһун-Күөлтэн кэлэн: “Сылгыһыт бары өттүнэн дэгиттэр буолуохтаах, бэл диэтэр асчыт, иистэнньэҥ буолуохтаах, бу күрэххэ мүнүүтэ да аҥара, сөкүүндэ да элбэҕи быһаарыа”, — диэн тылынан күрэх саҕаланна.
edersaas.ru
Аҕа дойду сэриитин кыттыылааҕа, Үлэ Кыһыл знамятын кавалера Федот Егоров 100 сылыгар аналлаах сылгыһыттар күрэхтэрин оҕолоро, сиэннэрэ уонна олохтоох дьаһалта тэрийдилэр, бириистэри туруордулар. Ааттах сылгыһыт уола Тимофей Егоров тэрийээччи буолан аҕатын туһунан олус истиҥник санаан-ахтан ааһан 100 биэттэн 100 кулунчук ылара, өрөспүүбүлүкэ иһигэр куруутун бастыҥ кэккэҕэ сылдьан Үлэ кыһыл знамятын ситиспитэ диэн киэн тутта кэпсээтэ уонна бу күрэҕинэн кини үтүө аатын, дьарыгын үйэтитэн, сайыннаран кэрэхсэнэр дьыаланы оҕолоро, сиэннэрэ олохтообуттарыгар барҕа махтал!
Сылгыһыттар күрэхтэригэр Маар Күөлтэн, Уһун Күөлтэн, Дьаархантан, Бордоҥтон, Тойбохойтон сэттэ сылгыһыт ох курдук оҥостон кэлэн бастакы түһүмэххэ атынан сылдьан ох ыттылар, араас моһолу туораатылар. Бордоҥтон эдэр сылгыһыт Николай Алексеев – бары кыахтаах уолаттар кэлбиттэр, ким кыахтаах ол кыайыа диэтэ, оттон Георгий Иванов – Дьаархан сылгыһыта, мин эрэ саастаахпын быһылаах, төрөппүт оҕолорбун кытта күрэхтэһэ сылдьар курдук сананабын диир. Маар Күөлтэн үс киһи кытынна, онтон биирдэстэрэ Дьулустан Никифоров хапсаҕайга барыларын кыайан күүстээх сылгыһыт аатын ылла, саамай уопуттаах Станислав Архипов сылгыһыттарга сүбэтэ элбэх, бу күннэргэ ат сүүрдүүтүгэр бэлэмнэнэбин диэн санаатын үллэһиннэ.
Көрөөччүлэр бары кэриэтэ эр дьоннор, ол иһигэр кырачаан Уйгун Тимофеев баар. Кини эмиэ сотору Кустук диэн аппынан маннык сылгыһыттар күрэхтэригэр кыттыам диэн үөртэ.
Салгыы сылгыһыттар хапсаҕайдастылар, хаатыҥкалаах хапсыһыы кытта баара. Онтон сыарҕа состулар, таһаҕас тиэйдилэр, ыҥыыры кэтэртилэр, кулуһун отуннулар, биатлоннаан ыллылар уонна сыарҕалаах ат сүүрдэн куоталастылар.
Күрэх түмүгүнэн кылаан кыайыылааҕынан Маар Күөлтэн Максим Михайлов буолан МР 155 саанан бириистэннэ, иккис миэстэни эмиэ Маар Күөлтэн Александр Никифоров ситиһэн 30.000-ны ылла, оттон үһүс миэстэни Тойбохойтон Айаал Корнилов ылан 20.000 солк. бириэмийэлэннэ.
Улуус бастыҥ сылгыһыттара Маар-Күөлгэ бааллар эбит. Бу эдэркээн уолаттар сылгылаах буоланнар саха бастыҥ дьонноро буоллахтара ити.
Хаартыска: интэриниэттэн.
Мария КОБЕЛЬЯНОВА — ТУСКУЛААНА