Уопсастыба

Бастыҥ суруналыыстар бэлиэтэннилэр



Сунтаар улууһун дьаһалтата өрөспүүбүлүкэ сонуну киэҥник тарҕатар сириэстибэлэригэр үлэлии-хамсыы сылдьар биир идэлээхтэригэр 2018 сылы түмүктүүр үөрүүлээх көрсүһүүнү Дьокуускай куоракка тэрийдэ.
edersaas

 

Номнуо үгэскэ кубулуйбут быйылгы төрдүс көрсүһүүгэ улуус баһылыга Анатолий Григорьев, баһылыгы социальнай боппуруостарга уонна имиджевай бэлиитикэҕэ солбуйааччы Гаврил Еремеев, Улуус мунньаҕын бэрэссэдээтэлэ Ульяна Попова, улуус култуураҕа управлениетын салайааччы Мария Кобельянова-Тускулаана кэлбиттэр.
Анатолий Григорьев, бастатан туран, ааспыт сылга Сунтаар улууһун сонуннарын өрөспүүбүлүкэ хаһыаттарыгар, телевидениеҕэ, Интернет-сайтарга, социальнай ситимнэргэ киэҥник уонна элбэхтик сырдата, улуус кыһалҕаларын туруорсарга  көхтөөхтүк үлэлэһэ сылдьар биир дойдулаахтарын эҕэрдэлээтэ, ону сэргэ  бастыҥнары бэлиэтээтэ. Улуус бастыҥ суруналыыстарынан уопсастыбанньык, суруналыыс Владислав Коротов, Анивера Акимова (“Саха сирэ” хаһыат), Татьяна Захарова-Лоһуура (“Кыым” хаһыат), РФ Суруналыыстарын сойууһун чилиэнэ Маргарита Винокурова ааттаннылар. Кинилэргэ анал бириэмийэлэри үөрүүлээх быһыыга-майгыга туттардылар. Учуонай Людмила Ефимоваҕа “Сунтаар улууһун бочуоттаах олохтооҕо” үрдүк аат иҥэрилиннэ. Ааспыт сылга Мексикаҕа баран саха төрүт үгэстэрин билиһиннэрбит биллиилээх уустар  Вильям Яковлев (Сунтаар улууһун бочуоттаах олохтооҕо) уонна Юрий Ксенофонтов күндү ыалдьыт буоллулар.

Баһылык 2018 сыл, Бэйэ оҥорон таһаарыытын сылын, кэккэ ситиһиилэрин бэлиэтээтэ. Ол курдук, улуус дьаһалтата “Удачнай” ГОК, “АЛРОСА” хампаанньа, Үөһээ Муунатааҕы хостонор баайдаах сир уо.д.а. промышленнай тэрилтэлэр салайааччыларын кытары бииргэ үлэлэстэ. Ол түмүгэр бу хампаанньаларга, атын улуустары кытары тэҥнээтэххэ, Сунтаар улууһун ыччата, дьоно саамай элбэхтэр. Улууска Бэйэ оҥорон таһаарыытын сыла биллэриллэн, дьон-сэргэ ыра санааларын олоххо киллэрэллэригэр, бизнестэрин тэринэллэригэр кыах бэриллибитэ – дьаһалта үлэтин биир сүрүн түмүгэ.
Сунтаар улууһун оскуолаларын, үөрэх кыһаларын үөрэнээччилэрэ, ыччаттара өрөспүүбүлүкэ таһыгар тахсан араас салааларга ситиһиилэрэ, кыайыы көтөллөөх кэлиилэрэ Сунтаар дьоно-сэргэтэ  сөптөөх хайысханы тутуһан үлэлии сылдьарын көрдөрөр. Ол иһигэр, хомолтолоох түбэлтэлэр, кыаллыбатах кыһалҕалар да бааллар. Ааспыт сыл атырдьах ыйыгар Бүлүү Эбэни киртитии улуус эрэ буолбакка, өрөспүүбүлүкэ араас муннугар олорор биир дойдулаахтары долгутта. Онуоха баһылык туора турбакка, биир санаанан көмөлөспүт, өйөөбүт уопсастыбанньыктарга, дьокутааттарга, тэрилтэ салайааччыларыгар, нэһилиэктэр баһылыктарыгар, суруналыыстарга  уо.д.а. махтанна.
Улуус дьаһалтата бу күннэргэ СӨ бырабыыталыстыбатыгар, Ил Түмэҥҥэ, министиэристибэлэргэ, биэдэмэстибэлэргэ уо.д.а. сылдьан, Бүлүү алдьархайын содулун туоратыыга, харыстыыр дьаһаллары ыытыыга туох үлэлэр барыахтаахтарын чопчулаан, боротокуол оҥоһуллан, күүстээх үлэни ыыта сылдьар.
Манна барытыгар сонуну киэҥник тарҕатар сириэстибэлэр көхтөөхтүк кыттыһан үлэлииллэригэр эрэлин биллэрдэ, улууска биллэриллибит Экология уонна Доруобуйа сылыгар үлэлэригэр ситиһиини баҕарда.
Надежда ЕГОРОВА, “Саха сирэ”, edersaas

2
0

Санааҕын суруй