Өрүү буоларыныы, циркэҕэ Саха сирин араас муннуктарыттан бастыҥ үөрэхтээх, норуоттар икки ардыларынааҕы, Бүтүн Арассыыйатааҕы олимпиадалар, научнай-практическай кэмпириэнсийэлэр, спортивнай күрэхтэһиилэр кыайыылаахтара, призердара, туохха барытыгар көхтөөх, ураты талааннаах 700 оҕо муһунна. Кинилэр Дьокуускайга бары биир сыаллаах кэлбиттэр – Ил Дархан Саҥа дьыллааҕы Харыйатыгар сылдьар.
Сыл ахсын оҕолор циркэҕэ киирээт, остуоруйа дойдутугар умсаллар. Быйыл үтүө уонна куһаҕан санаа охсуһууларын көрдөрөр бөлүһүөктүү, ыччаты элбэххэ үөрэтэр Чарльз Диккенс “Рождественская песнь в прозе” айымньытынан испэктээги көрдүлэр. Итини барытын олохтоох артыыстарбыт уонна оҕолор цирковой нүөмэрдэринэн, ырыаларынан, үҥкүүлэринэн киэргэттилэр.
— Саҥа дьылы көрсөрбүтүгэр, ааһан эрэр сыл туох бэлиэни хаалларан баран эрэрин ырытар үгэстээхпит. Биһиги 2017 сыл түмүктэриттэн үөрүөх тустаахпыт. Саха Өрөспүүбүлүкэтэ кэлиҥҥи кэмҥэ сайдыылаах субъект быһыытынан биллэр. Биһиги оҕолорбут, ыччаттарбыт араас таһымнаах олимпиадаларга, куонкурустарга ситиһиилэнэллэр. Саха сирин аата култуура, спорт тэрээһиннэригэр, олимпиадаларга ааттанарыттан үөрэбин. Биһиги үөрэнээччилэрбит туохха барытыгар олус көхтөөхтөр. Аныгы технологияҕа, атын да хайысхаларга өйдөбүллэрэ киэҥ. Билигин оскуолаларга киирдэхпинэ биһиги оҕолорбут аан дойдуну кытта тэҥҥэ хардыылаан иһэллэрэ көстөр, — диэн СӨ Ил Дархана Егор Борисов бэлиэтээтэ. Итиэннэ Сергей Кривошапкиҥҥа (Кэбээйи, Сэбээн Күөл), Марфа Аммосоваҕа (Мэҥэ Хаҥалас, Төхтүр), Максим Саввиҥҥа (Дьокуускай, Саха-корейскай оскуола), Алексей Старостиҥҥа (Дьокуускай, физико-техническэй лиссиэй), Анастасия Шитиковаҕа (Алдан, 9-с №-дээх оскуола), Игорь Гузаировка (Мэҥэ Хаҥалас, Баатара), Аделия Неустроеваҕа (Ытык Күөл, 1-кы №-дээх оскуола), Максим Андреевка (Дьокуускай, 5-с №-дээх оскуола), Эльмира Алероеваҕа (Жатай, 2-с №-дээх оскуолата), Роман Богдановка (Нерюнгри, 24 №-дээх лиссиэй) анал плакеткалары туттарда. Харыйаҕа ыҥырыылаах оҕолор бары 25-тии тыһ. солк суумалаах истипиэндьийэнэн наҕараадаланнылар. Манна даҕатан эттэххэ, оҕолор аҥаардас бырааһынньыкка эрэ сылдьыбатылар. Ол курдук, “История – моя Россия” түмэли, “Кванториум” технопаарканы, СӨ филармониятын, о.д.а. көрдүлэр.
Ыраах Дьааҥы улууһун Дулҕалаах оскуолатын 11-с кылааһын үөрэнээччитэ Юлиана Сыромятникова: “Биһиги улууспутуттан 13 буолан кэллибит. Ил Дархан Харыйатыгар сылдьар дьолломмуппуттан наһаа үөрэбин. Циркэҕэ аан маҥнайгыбын сырыттым. Култуура миэстэлэрин көрдөрдүлэр. Бэйэм оҕо эрдэхпиттэн ыллыырбын сөбүлүүр буолан, СӨ филармонията миэхэ ордук умнуллубат өйдөбүлү хаалларда”, — диэн санаатын үллэһиннэ.
Кыттааччылар ааттарыттан Алексей Старостин махтал тылларын эттэ уонна оҕолор Ил Дарханы оҥорбут мэтириэттэрин Е.А.Борисовка тус бэйэтигэр туттарда.
Людмила ПОПОВА, “Саха сирэ” хаһыат, edersaas.ru