Бэҕэһээҥҥиттэн “Бастыҥ иитээччи-2017” өрөспүүбүлүкэтээҕи куонкурус саҕаланна. Быйыл 25 улуустан уонна куораттан уопсайа 26 иитээччи кыттара биллэр. Балаһыанньа быһыытынан, бэйэлэрин улуустарыгар кыайбыт иитээччилэр эрэ финалга кыттар бырааптаахтар. Онон чахчы даҕаны чаҕылхайдар эрэ сүүмэрдэнэн кэлэллэр.
edersaas.ru
“Бастыҥ иитээччи” куонкурус Саха сиригэр 2010 сылтан ыла ыытыллар. Тэрээһин сүрүн сыалынан — оскуола иннинээҕи үөрэх тэрилтэлэрин үлэһиттэрин идэтин таһымын үрдэтии; оҕону үөрэтиигэ, иитиигэ үрдүк көрдөрүүлээх иитээччини быһаарыы, көҕүлээһин; бастыҥ педагогическай уопуту тарҕатыы буолар.
Тэрээһини арыйыы кэмигэр “Арассыыйа бастыҥ иитээччитэ-2012” куонкурус кыайыылааҕа Аркадий Афонскай куонкурус бэлиэтин – хаалаах чөмчүүк тааһы (жемчужина в раковине) үөрүүлээх быһыыга-майгыга уматта. “Туймаада” ансаамбыл эр дьоно, Дьокуускай куорат “Теремок”, “Олененок” о.д.а. оҕо саадын иитиллээччилэрэ куонкурус кыттыылаахтарын, өрөспүүбүлүкэ араас муннуктарыттан мустубут оҕо саадын үлэһиттэрин иһирэх ырыаларынан эҕэрдэлээтилэр, үҥкүүлэрин бэлэхтээтилэр.
Куонкуруһу сыллата тупсаран, сайыннаран иһэллэр. Быйыл кыттааччылар оскуола иннинээҕи үөрэх сайдыытын аныгы хабаанын көрдөрөр лекция ааҕыахтара, биллэр-көстөр дьону кытта анал тиэмэнэн педагогическай түгэннэри ырытыһар ток-шоуга кыттыахтара. Тэрээһин бу түһүмэхтэрин интэриниэтинэн быһа көрдөрүөхтэрэ. Онон ааспыт сыллардааҕар өссө сэргэх, сонун куонкурус ыытыллара былааннанар.
Санатан эттэххэ, тустаах куонкурус 2010 сылтан ыла ыытыллар. Бу сыллар тухары, Саха сирин бастыҥ иитээччитэ сүүмэрдэнэн Арассыыйаҕа кыттар үрдүк, эппиэтинэстээх чиэскэ тиксэр. Ол курдук, “Арассыыйа бастыҥ иитээччитэ-2012” куонкуруска Аркадий Афонскай бастаабытын өйдүүр буолуохтааххыт. Итини таһынан өссө лауреаттар бааллар. Быйыл даҕаны өрөспүүбүлүкэтээҕи куонкуруска Саха сирин аатын бүтүн дойдуга доргуччу ааттатар кыахтаах иитээччи кыайарыгар бүк эрэнэбит.
Людмила ПОПОВА, “Саха сирэ” хаһыат, edersaas.ru
Ааптар хаартыскаҕа түһэриитэ.