«Кыһын Саха сириттэн саҕаланар» Бүтүн Арассыыйатааҕы бэстибээл уонна «Якутск – город возможностей» хайысха чэрчилэринэн, «Вкус Якутии» IV гастрономическай бэстибээл ыытыллар. Далааһыннаах тэрээһин сэтинньи 30 күнүттэн ахсынньы 3 күнүгэр диэри буолар. Бу туһунан Дьокуускай куорат уопсастыбаннаһы уонна иһитиннэрэр-биллэрэр маассабай сириэстибэлэри кытта үлэҕэ Департамена иһитиннэрэр.
Кэрэхсэбили ылбыт тэрээһин түһүлгэтигэр «Юрта», «Карэ», «Тамерлан», «Европа», «Хантер», «RENABO», «Атласовтар уһаайбалара», «Тыгын Дархан», «Мацури», «Тото-Хана» диэн дьоҥҥо-сэргэҕэ биллэр-көстөр үлэлээх эрэстэрээннэр кыттарга сайаапкаларын хайыы үйэ биэрбиттэр.
Күрэскэ кыттар эрэстэрээннэр повардар уонна кулинардар Арктика уонна Хотугу норуоттар үгэстийбит национальнай куукуналарын астаан, киэргэтэн, киһи хараҕар быраҕыллар бэртээхэй бүлүүдэ оҥорон бэлэмнээбиттэрин билиһиннэриэхтээхтэр. Шеф-повардар сокууска, бүлүүдэ, утах, минньигэс ас арааһын сыаналатыахтаахтар.
«Былырыын аҕыс эрэстэрээн кыттыбыт буоллаҕына, быйыл уоҥҥа тиийдэ. Бу тэрээһин далааһыннанан, болҕомтону тардара улаатан иһэрин көрдөрөр. Холобур, «Юрта», «Карэ», «Хантер», «RENABO», «Мацури» курдук биллэр-көстөр эрэстэрээннэр сыллата кытталлара эмиэ элбэҕи этэр. Онтон «Тамерлан» былырыын «Путешествие за вкусом» диэн кулинарнай бэстибээлгэ кыттыбыт буоллаҕына, быйыл манна кыттар баҕалааҕын биллэрэн улаханнык үөртэ», — диир Дьокуускай куорат дьаһалтатын урбааҥҥа, потребительскай ырыынакка, туризмы сайыннарыыга уонна тырааныспарга Департаменын отделын начаалынньыга Светлана Василенко.
Кини ааспыт сылларга тэрээһин фуршет курдук ыытыллыбыт буоллаҕына, быйыл кыра уларытыыны киллэрбиттэрин эттэ. «Шеф-повардар бүлүүдэлэрэ уочаратынан көрдөрүллүөхтэрэ. Тымныы аһы-үөлү киллэрииттэн саҕаланыа, салгыы сылаас аһы-үөлү, минньигэстэри, утахтары официаннар бэрээдэгинэн аҕалан иһиэхтэрэ. Манна даҕатан эттэххэ, былырыын «Махтал» эрэстэрээҥҥэ маннык хабааннаахтык ыытыллыбытын бары олус сөбүлээбиттэрэ. Онон ол учуоттанна», — диэн Светлана Николаевна быһаарар.
Тэрээһиҥҥэ сылдьыан баҕалаахтар билиэти куонкуруска кыттар эрэстэрээннэртэн ылыахтарын сөп. Маныаха билиэттээхтэргэ эрэстэрээннэр дьаһалталара остуоллары бэлэмнээн көрсөллөр. Маны сэргэ, бэстибээл кэмигэр ким баҕалаах “Анал этии” (эбиэт эбэтэр киэһээҥҥи аһылык) диэн менюнан, анаан быһыллыбыт сыананан остуол сакаастыыра көҥүллэнэрин туһунан этэллэр.
Быйылгы гастрономическай бэстибээлгэ «Муус Хайа» эрэстэрээн шеф-повара, Россия шеф-повардарын Национальнай Гильдиятын чилиэнэ Николай Габышев дьүүллүүр сүбэ бэрэссэдээтэлинэн талыллыбыт. Шеф-повардар Аан дойдутааҕы Ассоциацияларын Холбоһуктарын судьуйата (WACS), «ПИР» кулинарнай куонкурустар судьуйа-координатордара, «Пуппен Хаус» гастрономическай тыйаатыры бас билээччи (Новосибирск), Японияттан шеф-повар Шибуичи Косаки, о.д.а. бочуоттаах ыалдьыттар быһыыларынан ыҥырыллыбыттар.
Тэрийээччилэр иһитиннэрбиттэринэн, бүлүүдэлэр этническэй уонна классическай эрэстэрээннэр диэн категорияларынан сыаналаныахтаахтар. Түмүккэ, хас биирдии категорияҕа үстүү номинация олохтонон, дипломнар уонна сыаналаах бириистэр туттарыллаллар. Ону таһынан, Дьокуускай куорат баһылыгын Кубога анал бириис быһыытынан бэлэхтэнэрэ быһаарыллыбыт. О.д.а. бириистэр үөрүүнү үксэтиэхтэрэ диэн тэрийээччилэр этэллэр.
Кыайыылаахтары ахсынньы 3 күнүгэр «Триумф» спортивнай кииҥҥэ эҕэрдэлиэхтэрэ. Ити күн тэрээһин чэрчитинэн «Путешествие за вкусом» бэстибээл ыытыллыа.