Таатта эдэр ыала – Вырдылиннар

Ааптар: 
Бөлөххө киир:

Катялаах Ганя ааттара да дьүөрэ. Иккиэн Таатта улууһун олохтоохторо. Катя Ытык-Күөлтэн, оттон Ганя Чөркөөхтөн төрүттээхтэр. Эдэр ыал үс оҕолоох. Мин дьиэ кэргэн ийэтэ Катяны кытта көрсөн кэпсэттим. Кини оҕо иитиитин, ыал эйгэтин, ийэ, аҕа оруолун уонна да элбэҕи сэһэргээтэ. Вырдылиннар быйыл өрөспүүбүлүкэтээҕи “Эдэр дьиэ кэргэн” куонкуруска кыайбыттара.

— Биһиги 2007 сыллаахха билсэн ыал буолбуппут. Үс оҕолоохпут. Миша 7 саастаах, Айыына 4 саастаах, Алгыстаан 1,5 саастаах. Мин уруккуттан элбэх оҕолонуохпун баҕарарым. Тоҕо диэтэххэ, мин да өттүбүттэн, аҕабыт да өттүттэн элбэх оҕолоох дьиэ кэргэҥҥэ улааппыт буоламмыт, оҕо саҥатынан, күлүүтүнэн толору дьиэ ол дьоллоох ыал тусаһата диэн өйдөбүллээхпит.
— Хас биирдии ыал үтүө үгэстэрдээх, Эһиги оҕолоргутун хайдах иитэҕит?
— Биһиги кэргэмминээн иккиэн оҕолорбутун сүбэнэн иитэргэ дьулуһабыт. Иккиэн элбэх оҕолоох ыалга улааппыт, иитиллибит буоламмыт, оҕолорбутун үлэнэн иитэ сатыыбыт. Дьиэбитигэр остуол оонньууларын көҕүлүүбүт. Уопсайынан, дьиэ кэргэҥҥэ түмсүүлээх буоларга остуол тула олорон аһааһын, сир астааһын, бииргэ сынньалаҥ улахан оруоллаах. Мишабыт номнуо балтылаах быраатын оҕолуур, улахан оҕо буолан эппиэтинэһи сүгэр.
— Билигин эдэр ыал дьиэ-уот суоҕуттан, харчы тиийбэтиттэн кыһарыйтарар. Маннык кыһалҕаны эһиги хайдах туораабыккытый?
— Биһиги 2012 сыллаахха эдэр дьиэ кэргэҥҥэ аналлаах бырагырааммаҕа кыттан 8Х10 дьиэни туттан киирбиппит. Манна иккис оҕобут материнскай хапытаалын туһаммыппыт. Оҕолорбун көрө олорон дьиэбит иһинэн фотосалон арыйан үлэлэтэбит. Эргэ кассетаттан видеоҕа оцифровка, хаартыскаҕа түһэрии, ону сэргэ, фотошоп бары көрүҥүн, видеомонтаж өҥөлөрүн оҥоробут. Сыбаайбаларга, үбүлүөйдэргэ ыҥырыы оҥоробут. Мин санаабар, эдэр дьон туохтан да иҥнэн турбакка туохха сатабыллаахтарынан үлэлээн иһиэхтэрин наада. Туох да судургутук кэлбэт. Биир уопсай сүбэнэн кыһалҕалары быһаарабыт.
— Тыл-тылга киирсибэт, ардыгар өйдөспөт түгэҥҥэ хайдах уопсай сүбэни булаҕыт?
— Мин санаабар, дьиҥ тапталынан, биир сүбэнэн холбоспут дьон уопсай тылы була сатыырга икки өттүттэн кыһаныахтаахтар. Биһиги кыыһырсар да түгэммитигэр хаһан да уһуннук тута сылдьааччыбыт суох. Түргэнник аһарынабыт. Эйэлээх эйгэни, сылаас сыһыаны дьиэ кэргэн иһигэр ийэ тэрийиэхтээх. Оччоҕо оҕолор, ыал аҕата өрүү дьиэлэригэр тардылыктаах, олоххо бигэ тирэхтээх буолаллар. Мин ийэм Маргарита Михайловна өрүү элбэх астаах-үөллээх, дьиэ кэргэнин түмэр бастыҥ хаһаайка. Кини курдук мин эмиэ остуол хотойорунан астаах, дьиэ кэргэммин ол остуол тула түмэр ийэ буоларга кыһаллабын. Хаһан даҕаны куһаҕан настырыанньалаах ас астаабаппын. Таптыыр дьонум аһыыр астарын үөрэ-көтө, сүргэм көтөҕүллэн тэрийэбин.
— Общественнай үлэни уонна дьиэ кэргэн олоҕун дьүөрэлии тутар кистэлэҥнээххит дуо?
— Аҕабыт сүрүн үлэтин таһынан гиирэ спордунан дьарыктанар. Улуус мунньаҕын дьокутаата. Маны сэргэ, 2013 сыллаахха «Биэс сыл бииргэ» диэн улуустааҕы куонкуруска биһиги дьиэ кэргэн кыайан турардаахпыт, «Две звезды» куонкуруска кыттыбыппыт. Ганябынаан иккиэн көхтөөх буоламмыт дьиэ кэргэни уонна общественнай үлэни дьүөрэлии тутары уустугурдубаппыт. Сахалыы судургутук олоробут, оҕолорбутун улаатыннарабыт.
— Эһиги быйылгы Ыччат ыһыаҕар «Эдэр дьиэ кэргэн» куонкурус кыайыылаахтара буолбуккут. Итиннэ тус санааҕыт?
— Биһиги улууспут чиэһин көмүскүү уонна атын улуус эдэр ыалларын көрө-истэ кэлбиппит. Бары да бэрт тэрээһиннээх, дьаһаллаах, олоххо көхтөөх дьиэ кэргэттэр кыттыбыттара. Бу куонкурус сүрүн соруга бириискэ тиксээһин дуу, эбэтэр аат арбаныытыгар буолбакка, өрөспүүбүлүкэбитигэр эдэр ыал элбиирин, көхтөөх, эйэлээх олох үксүүрүн туһугар анаан тэриллэр. Онон маннык куонкурустары тэрийэн эдэр ыалы көҕүлээһин сөптөөх быһаарыныы дии саныыбын. Киһи үчүгэйи көрөн үтүктүөхтээх, онтон олоххо тирэхтэниэхтээх. 

Ульяна ЗАХАРОВА, edersaas.ru 

+1
0
+1
0
+1
0
+1
0
+1
0
+1
0
+1
0