2018 сыл түмүгүнэн бастыҥ дьиэ кэргэттэри наҕараадалаатылар. “Бастыҥ дьиэ кэргэн” куонкурус 2000 сыллартан ыытыллар. Урут барыта бииргэ буолар эбит буоллаҕына, кэлин биэс хайысхаҕа арааран, куонкурустары сыл устата тус-туспа ыыталлар.
Быйыл куонкурустары аан бастаан кэтэхтэн ыыттылар. Онон кыттар ыал ахсаана да элбээтэ, ыраах сытар нэһилиэктэртэн кыттар буоллулар. Холобур, урут хоту улуустартан кыайан кэлэн кыттыбат этилэр.
Бастаабыт дьиэ кэргэттэргэ 300-түү тыһыынча солкуобайы туттардылар. “Үтүө үгэстэрдээх ыал” куонкуруска Үөһээ Бүлүү улууһун Харыйалаах сэлиэнньэтиттэн Мойтохоновтар-Васильевтар кыайдылар. “Бастыҥ тыа сирин ыала” ааты Дьааҥыттан Слепцовтар, “Бастыҥ куорат ыала” – Дьокуускайтан Петровтар, “Бастыҥ эдэр ыал” – Горнай Бэрдьигэстээҕиттэн Максимовтар, “Бастыҥ көс ыал” – Эбээн Бытантай улууһун Баатаҕай Алыытыттан табаһыт Константиновтар ылан, наҕараадаланнылар.
— Өрөспүүбүлүкэ Ил Дархана Айсен Николаев үүнэр 2019 сылы Сомоҕолоһуу сылынан биллэрдэ. Бу бүгүҥҥү тэрээһиммит дьиэ кэргэттэр сомоҕолоһоллорун көрдөрөр. Хас биирдии дьиэ кэргэҥҥэ өйдөһүү, күүһү түмүү, көмөлөһүү баар буоллаҕына, уопсастыба эмиэ түмсүүлээх, күүстээх буолар, —— диэн бырабыыталыстыба бэрэссэдээтэлин солбуйааччы Ольга Балабкина куонкурус кыттыылаахтарын эҕэрдэлээтэ.
Ангелина Васильева, “Саха сирэ” хаһыат, edersaas.ru
Андрей Сорокин хаартыскаҕа түһэриилэрэ.