Нэдиэлэ кэриҥэ ыытыллыбыт Азия-Тиихэй акыйаан эдэр чинчийээччилэрин кэмпириэнсийэтэ үрдүк таһымнаахтык ааста. Уопсайа, 11 дойдуттан 75 оҕо кытынна. Итини сэргэ, норуоттар икки ардыларынааҕы Саха сиринээҕи эдэр чинчийээччилэр II-с кэмпириэнсийэ-куонкурустара буолла.
“Саха сирэ” хаһыат, edersaas.ru
СӨ үөрэҕин уонна наукатын миниистирэ Владимир Егоров: “Интэриэһинэй үлэлэр бааллар. Космическай спутнигы, араас салааҕа тиэхиньиичэскэй үлэни кытта сибээстээх, о.д.а. чинчийиилэри бэлиэтиэххэ сөп.
Маннык улахан таһымнаах тэрээһиннэр үөрэх бары систиэмэтин иитинэн ыытыллаллар уонна национальнай бырайыактары, Ил Дархан ыйааҕын, СӨ социальнай-экэнэмиичэскэй сайдыытын стратегиятын олоххо киллэрэбит. Оҕо барыта хаачыстыбалаах үөрэҕинэн хааччыллыытыгар улахан болҕомтобутун уурабыт. Бүгүн наҕараадаламмыт оҕолор кэккэлэригэр Нам, Чурапчы, Амма, Нерюнгри, Мирнэй, о.д.а. улуустар оҕолорун көрдүбүт. СӨ Наукаларын Аччыгый академията, АйТи лиссиэй, Норуоттар икки ардыларынааҕы арктика оскуолата курдук инновация тэрилтэлэрин арыйыы, өрөспүүбүлүкэ үөрэнээччилэрэ ханна олороллоруттан тутулуга суох, үөрэх биир улахан систиэмэтигэр хабыллан, хаачыстыбалаах үөрэҕинэн хааччыллыылара буолар”, — диэн ыйда.
Сингапур Национальнай университетын бэрэпиэссэрэ Леонг Чуан Квек орто таһым таһыччы үрдүк буолан, кыайыылааҕы быһаарар уустук буолла диэн этэр. Быһа холоон кыттааччы 60-тан тахса бырыһыана мэтээл ылбыт. “Манна хастыы даҕаны сыл чинчийбит оҕолор кытыннылар. Хас биирдиилэрэ мэтээл ылар кыахтааҕа, эбээһинэстээҕэ даҕаны. Арассыыйа хамаандата өссө элбэх мэтээли ылар кыахтааҕа. Ол эрээри, араас дойдулар кытыннылар. Онон тиэхиньиичэскэй өттүнэн хааччахтаатыбыт”, — диэн ыйар. Бэрэпиэссэр программированиеҕа, блокчейҥҥа, нанотехнологияҕа интэриэһинэй чинчийиилэр баалларын бэлиэтиир.
Кэмпириэнсийэ көһө сылдьан ыытыллар. Кэлэр тэрээһин Макаоҕа ыытыллыаҕа.
Людмила ПОПОВА, “Саха сирэ” хаһыат, edersaas.ru