Быйыл «Инники идэҕэ хардыылар» пуорумҥа эдэр чинчийээччилэр бырайыактара икки төгүл элбэҕэ бэлиэтэннэ.
Арассыыйаҕа Наука уонна технология сылынан, эдэр чинчийээччилэр өрөспүүбүлүкэтээҕи XV «Инники идэҕэ хардыылар» пуорумнара далааһыннаахтык ыытыллар. Быйыл ааспыт сыллааҕар икки төгүл элбэх, 1 290 кыттааччы баарын иһитиннэрэллэр.
«Ыччат билиитин-көрүүтүн уонна айар кыаҕын сайыннарарга, биһиги табыгастаах усулуобуйа тэриллэригэр болҕомтобутун уурабыт. Кинилэр научнай-чинчийэр үлэҕэ көхтөөхтүк кытталлара наада. Бу инникитин идэни таларга көмөлөөх буолара саарбахтаммат«, — диэн бэлиэтиир СӨ Аҕа баһылыга Айсен Николаев.
Быйыл пуорумҥа кыттарга 1312 сайаапка киирбит, ону сэргэ өрөспүүбүлүкэ 33 үөрэх кыһата кыттар баҕалааҕын биллэрбит. Итинтэн түмүккэ 1290 бастыҥтан бастыҥнар талыллыбыттар. Пуорум иитинэн научнай-практическай кэмпириэнсийэ, «Digital IDea» күөн күрэс, «Марафон бизнес-идей» дьыалабыай оонньуу, «Развитие науки в Республике Саха (Якутия)» интернет-олимпиада ыытыллаллар. Ону сэргэ, кыттааччылар бэйэлэрин инженернэй бырайыактарын уонна мода, дизайн эйгэтигэр бырайыактарын билиһиннэрэллэр. Өссө, маны таһынан, аан бастакытын «Юный мастер» диэн оскуола үөрэнээччилэригэр уонна оскуолаҕа киириэн иннинээҕи саастаах оҕолорго медиа-куонкурус ыытыллар.
Түмүк уонна кыайыылаахтары наҕараадалааһын ахсынньы 9 күнүгэр «Арассыыйа — мин историям» пааркаҕа ыытыллар.
Пуоруму СӨ Үөрэх уонна наука министиэристибэтэ, СӨ профессиональнай үөрэхтээһини сайыннарыы института тэрийдилэр. Бу пуорум 2007 сылтан ыытыллар. Кыайыылаахтар — бастыҥ научнай-чинчийэр үлэлээхтэр эбэтэр научнай-практическай үлэлээхтэр, Москваҕа, Санкт-Петербурга, Новосибирскайга, Казаньҥа Арассыыйатааҕы тэрээһиннэргэ кыттыахтара.
+1
+1
+1
+1
+1
+1
+1