Бастыҥ бырайыактардаах оҕо уопсастыбаннай түмсүүлэригэр Хаҥалас баһылыгын граннара туттарылыннылар.
Улууска оҕо аймахха туһуланар үлэни-хамнаһы кэҥэтэргэ, хамсааһыны сайыннарарга анаан төрдүс сылын улуус баһылыгын граннара туттарыллаллар. Быйылгы күөн күрэскэ 11 түмсүү кыттыыны ылбыт. Хамыыһыйа киирбит бырайыактары көрөн-истэн баран, үс оскуолаҕа кыайыыны биэрбит. Покровскайдааҕы И.М.Яковлев аатынан 1 №-дээх орто оскуола «В РИТМ-е труда» бырайыагынан, М.Е.Васильева аатынан 2 Малдьаҕар орто оскуолата «Выпуск книги об учителе «Билии, сайдыы сарыала» уонна Кыһыл Үрүйэ орто оскуолата «Вахта памяти» бырайыагынан. Кыайыылаах түмсүүлэр бырайыактарын олоххо киллэрэргэ 30000 солк. ылаллар.
Улахан Аан орто оскуолатын эбии үөрэхтээһиҥҥэ педагога Надежда Громова кэпсээбитинэн, үөрэнээччилэр граҥҥа ылбыт харчыларынан учуутал Матрена Егоровна Васильева (оскуола кини аатын сүгэр) туһунан кинигэ таһаарар былааннаахтар.
«30 тыһ.солкуобайга, А5 форматтаах, 72 сирэйдээх 70 кинигэни бэчээттэниэ. Бүгүҥҥү күҥҥэ үлэ 80% толорулунна. Кинигэбит күн сирин көрдөҕүнэ, атыыга бардаҕына, онно киирбит харчынан М.Е.Васильева үлэтин, олоҕун туһунан истиэндэ оҥорор баҕалаахпыт. Оҕолор үлэҕэ быһаччы кыттыыны ылаллар. Нэһилиэк дьонуттан, Матрена Егоровна үөрэнээччилэриттэн ахтыылары хомуйаллар, ону компьютерга таҥаллар. Бырайыакка түөрт учуутал уонна 5-10 кылаас үөрэнээччилэрэ кытталлар«, — диэн бырайыак салайааччыта сырдатар.
Санатан эттэххэ, бу куонкурус 2017 сылтан ыытыллар. Күрэс сыала — социальнай суолталаах көҕүлээһини олоххо киллэрэргэ улахан дьону кытары оҕолор бииргэ кыттыһан, көмөлөөн үлэлииллэрин сайыннарыы.
+1
+1
+1
+1
+1
+1
+1