Сунтаар улууһугар Тыа сирин үлэһит дьонун сылын чэрчитинэн култуура үлэһиттэригэр, баттах кырыйааччыларга, килиэби астааччыларга, сылгыһыттарга, социальнай үлэһиттэргэ уо.д.а. бастыҥнары талыы куонкурустара нэһилиэнньэ сэҥээриитин ылбыттара. Ыам ыйын 27 күнүгэр «Сунтаар улууһугар тыа сирин бастыҥ биэлсэрэ-2017 с» куонкурус улуус киинигэр ураты сэргэхтик ыытылынна.
Надежда ЕГОРОВА, «Саха сирэ» хаһыат, edersaas.ru
Куонкурус соругунан эмчит идэтигэр таһымын, имиджин, эмчиттэр бырааптарын үрдэтии буолаллар. «Бартыһаан» кулуупка ыытыллыбыт сонун тэрээһиҥҥэ биэлсэр-акушер пууннарыттан, учаастактааҕы балыыһалартан уонна отделениелартан барыта 10 үрүҥ халааттаах аанньал кытынна.
Дьүүллүүр сүбэҕэ Сунтаар улууһун баһылыга А.В.Григорьев, баһылыгы социальнай уонна имиджевай бэлиитикэҕэ солбуйааччы У.Д.Попова, дьокутааттар улуустааҕы мунньахтарын бэрэссэдээтэлэ М.А.Максимов, улуус педиатра Л.С.Васильева, терапевт Н.М.Спиридонова, кылаабынай бырааһы тэрээһин-методическай үлэҕэ солбуйааччы Н.Д.Михайлова үлэлээтилэр.
Дьүүллүүр сүбэ кыттааччылар бэйэлэрин билиһиннэрбиттэрин кэннэ, «Эйэҕэс-сайаҕас медицина» бырайыак чэрчитинэн бастакы көмөнү оҥорууга билиилэрин-көрүүлэрин, чөл олох тиэмэтигэр кыра кээмэйдээх туруорууларын сыаналаата. Дьэ, манна кэрэ аҥаардар сүрүн үлэлэрин сэргэ, иистэнэр, үҥкүүлүүр, ыллыыр, оһуокайдыыр, сценкаҕа оонньуур талааннара арылынна.
Куонкурус түмүгүнэн, Гран-прины Түбэйдээҕи биэлсэр-акушер пуунун биэлсэрэ Анна Иванова ылан, 50000 суумалаах сертификатынан наҕараадаланна.
Бастакы миэстэни – Куокунутааҕы ФАП биэлсэрэ Нина Степанова (принтер);
Иккис миэстэни Толооннооҕу ФАП биэлсэрэ Зинаида Громова (5000 солк);
Үһүс миэстэни Аллаҥатааҕы ФАП биэлсэрэ Диана Каплина (3000) ыллылар.
Ону таһынан, номинацияларынан кыайыылаахтар быһаарылыннылар. Ол курдук, Василина Меняковаҕа (Маар Күөл) – «Кыайыыга дьулуурун иһин», Ульяна Ераскумовоҕа (Туойдаах) «Үтүө суобастаах үлэтин иһин», Мария Алексееваҕа (Кутана) «Махтаныы уонна ытыктабыл», Лидия Прокопьеваҕа (КДЛ) – «Идэҕэ бэринии», Евгения Винокуроваҕа (Бордоҥ) «Тус сыалы тутуһуу уонна үлэни таптааһын», Татьяна Аммосоваҕа – «Идэтийии» анал ааттар иҥэрилиннилэр.
Сунтаардааҕы киин балыыһа кылаабынай бырааһа Светлана Иванова биэлсэрдэр көхтөөхтүк кыттыбыттарын иһин махтанна. Улуус баһылыга Анатолий Васильевич нэһилиэнньэ доруобуйата тупсарыгар күнүстэри-түүннэри сыралаһан үлэлиир тыа сирин биэлсэрдэригэр: «Эмчиттэр аан дойдутааҕы бырааһынньыктара буолаары турарынан, эһиэхэ чэгиэн доруобуйаны, ыарыһахтарга истиҥ-эйэҕэс сыһыаны, үлэҕитигэр уонна дьиэ кэргэттэргитигэр ситиһиилэри баҕарабын. Эһиги бааргытыттан бүтүн бөһүөлэк сырдыыр. Эһиги биир дойдулаахтаргытыгар сырдыгы-сылааһы, үтүө санааны бэлэхтиигит», – диэн улуус дьаһалтатын аатыттан баҕа санаатын тириэртэ.
Кырдьыга да, тыа сирин эмчитин үлэтэ, эппиэтинэһэ олус улахан. Ыарыһаҕы эмчит үтүө санаата, сырдык мичээрэ да эмтиир диир буоллахха, бэйэтэ эмчиттээх нэһилиэк олоххо эрэлэ эмиэ күүстээх.
Инникитин улууска маннык куонкурустарга эколог, почтальон, тутааччы, учуутал уо.д.а. идэлээхтэр күрэхтэһиэхтэрэ.
Надежда ЕГОРОВА, «Саха сирэ» хаһыат, edersaas.ru