Интэриниэт хото киирэ илик нэһилиэктэригэр кинигэни, хаһыаты аргыс оҥостубут дьон олохтоох бибилэтиэкэттэн арахпаттар. Атамайдааҕы бибилэтиэкэ 380-тан тахса куруук сылдьар ааҕааччылаах,
9 тыһыынчаттан тахса кинигэлээх.
edersaas.ru
– Сыллааҕы былаан оҥостон, сүрүннээн, уһуйаан, оскуола оҕолорун, ыччаттары кытары үлэлиибит. Быйыл ини-бии Семен уонна Софрон Даниловтар ааттарынан «Даниловтар ааҕыылара» тохсус сылын ыытылынна. Оскуола оҕолоро күрэхтэстилэр. Биһиги биир дойдулаахпыт бэйиэт, фронтовик Уйбаан Федоровка аналлаах «Федоров ааҕыылара» үһүс сылын ыытыллан, оҕо саадын иитиллээччилэриттэн саҕалаан, аҕам саастаах кырдьаҕастарыгар диэри көхтөөхтүк кытыннылар. Маны таһынан, оскуолаҕа, уһуйааҥҥа библио-уруоктары ыытабыт, нуучча, омук остуоруйаларын тылбаастаан кэпсиибит, – диэн сэбиэдиссэй Елизавета Ефремова кэпсии тоһуйда.
«Библио-түүн», «Таайтарыылаах Таҥха», «Квест-оонньуулар» уонна да атын интэриэһинэй тэрээһиннэри тиһигин быспакка ыыталлар. Хас да сылтан бэттэх, «Бастыҥ ааҕааччы» номинация олохтуур буоланнар, бастакы сылга бу ааты Дмитрий Яковлев, салгыы Любовь Варламова, оттон быйыл Николай Александров ылбыттар.
Дьаһалта бибилэтиэкэҕэ быйыл 60 тыһ. солк. көрөн, оҕолорго аналлаах муннук оҥостубуттар уонна 10 тыһ. солк. «Бичик» кинигэ кыһатыттан саҥа кинигэлэри атыылаһан таһаарбыттар.
Бибилэтиэкэ олохтоох дьаһалта дьиэтигэр дьукаахтаһан олорор. Дьаһалтаҕа наадатынан кэлбит дьон эрэ барыта таарыйа хаһыат көрөр, кинигэ уларсар. Суруналыыс киһи быһыытынан, «Атамай сирдьитэ» диэн тэттик хаһыакка хараҕым хатанна.
Онуоха Елизавета: «Олохтоох дьаһалтаны кытары кыттыһан хаһыат таһаарабыт. Ыйга биирдэ. Нэһилиэк сонуннарын, баһылык дьаһалын, интэриэһинэй матырыйааллары бэчээттиирбитин дьон сэҥээрэн ааҕар», – диэн хаһыаттарын көрдөрө-көрдөрө кэпсээтэ. Билигин кыралыын-улаханныын интэриниэккэ бас бэриннэрбит да, үгүс киһи кинигэни, хаһыаты тутан олорон ааҕыан баҕарар. Онон, бибилэтиэкэлэр ааннара син биир сабыллыбат, үлэтэ уҕараабат.
Анивера Акимова, edersaas.ru