Саха сиригэр “Сыл бастыҥ аҕата” өрөспүүбүлүкэтээҕи онлайн-куонкурус саҕаланна. Бу куонкуруһу ыытар туһунан сөбүлэһиигэ үлэ, социальнай сайдыы миниистирэ Елена Волкова уонна “СӨ Аҕаларын лигатын” бэрэссэдээтэлэ Айхал Габышев илии баттаатылар.
Куонкурус аҕа оруолун үрдэтэр, дьиэ кэргэҥҥэ оҕону иитиигэ болҕомтону тардар сыаллаах ыытыллар. Сүрүн болҕомтону аҕалар өй-санаа өттүнэн, духуобунай, патриотическай хаачыстыбаларыгар ууруохтара. Үс түһүмэҕинэн: бастаан нэһилиэктэргэ, онтон улуустарга, уокуруктарга, ол кэнниттэн өрөспүүбүлүкэтээҕи финал ыытыллар.
Кыайыылаах 100 тыһыынча солкуобайы ылыаҕа. Ону тэҥэ, “Бастыҥ аҕа – Дьиэ кэргэн баһылыга”, “Бастыҥ аҕа – Уопсастыбаннай диэйэтэл”, “Аҕалар сүбэлэрин саамай көхтөөх аҕата”, “Саамай талааннаах аҕа” анал ааттар бааллар.
Быйылгы куонкурус бастакы бэрэсидьиэн Михаил Николаев 85 сааһыгар ананар. Биллэрин курдук, кини 1999 сыллаахха өрөспүүбүлүкэҕэ Аҕа күнүн олохтообута.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru