Саха сиригэр оҕо сайыҥҥы сынньалаҥын тэрийии быйыл хайдаҕый? Иһитиннэриллибитнэн, бастакы симиэнэҕэ уопсайа 462 лааҕыр үлэлиир.
Манна барыта 25 674 оҕо сылдьар. ДНР уонна ЛНР кэлбит 16 оҕо Нерюнгригэ, Мииринэйгэ, Уус Маайаҕа, Дьокуускайга баар лааҕырдарга сынньаналлар.
Ил Дархан Айсен Николаев өрөспүүбүлүкэҕэ үөрэх ситимигэр оҕолору сайыҥҥы сынньалаҥынан уонна доруобуйаларын чэбдигирдиинэн төһө кыалларынан киэҥник хабар туһунан этэн турар. Оттон сэргээбиттэргэ, сэҥээрбиттэргэ табыгастаах буоларын курдук, лааҕырга сурутуу «Е-услуги. Образование» порталынан ыытыллар.
Бастакы симиэнэҕэ үлэлиир лааҕырдартан — 32 куорат таһынааҕы, 2997 оҕо сылдьар. 391 күнүскүгэ 21 263 оҕо, 26 үлэ уонна сынньалаҥ лааҕырыгар 974 оҕо хабыллыбыт, 13 балааккалаахха 440 оҕо.
СӨ Үөрэх уонна наука миниистирэ Ирина Любимова бэлиэтииринэн, лааҕыры бэлэмнииргэ уонна үлэлиирин устатыгар улахан болҕомто оҕолорго эргиччи куттал суох буолуутугар ууруллар.
«Манна видеонан кэтээн көрүү, харабыллар үлэлэрэ, түрүбүөгэни биллэрэр кунуопкалар, баһаартан куттал суох буолуутун хааччыйар тэриллэр, ас-үөл хаачыстыбата, тиэйиигэ-таһыыга куттал суох буолуутун тэрийии барыта киирэллэр. Бэриллибит ыйыылар-кэрдиилэр толору толоруллан иһэллэрин туһуттан мэдиссиинэ хосторун уонна пищеблок персоналын үлэтигэр улахан болҕомтобутун уурабыт«, — диэн этэр миниистир.
Краснодар кыраайыгар баар «Морское братство» оҕо доруобуйатын чэбдигирдэр лааҕыр бастакы симиэнэтигэр өрөспүүбүлүкэ бары муннугуттан 174 оҕо сынньанна. Итинтэн 77 оҕо арктика оройуоннарыттан федеральнай өйөбүлүнэн. Иккис симиэнэҕэ, бэс ыйын 26 күнүттэн сынньанарга, 174 оҕо көппүтэ, итинтэн 89-һа арктика оройуоннарыттан. Норуоттар икки ардыларынааҕы «Артек» оҕо киинигэр, «Океан» уонна «Орленок» Арассыыйатааҕы кииннэргэ 175 оҕо сынньанар.
Уопсайынан быйыл сайын 112 тыһ. оҕо сайыҥҥы сынньалаҥынан хабыллара былааннанар. 37 тыһ. тахса оҕо өрөспүүбүлүкэ иһигэр сынньаныахтара, доруобуйаларын бөҕөргөтүөхтэрэ. Оттон сайыҥҥы оскуолаларга, куруһуоктарга, туристическай маршруттарынан сылдьарга 35 тыһ. оҕо хабыллыа. Маны таһынан 1 449 оҕо өрөспүүбүлүкэ таһыгар сынньана, доруобуйатын чэбдигирдэ барыаҕа. 976 оҕо Краснодар уонна Приморье кыраайдарыгар лааҕырдарга сылдьыахтара. Итинтэн 644 оҕо СӨ судаарыстыбаннай бырагырааматын суотугар, 332 оҕо арктическай оройуоннартан федеральнай субсидиянан.
СӨ Ил Дархан уонна Бырабыыталыстыба пресс-сулууспата