Саха сиригэр аан силии бастакы донора баар буолла. Силии донордарыгар Федеральнай испииһэк оҥоһуллубута, онно киирэн, аан бастаан Саха сирин олохтооҕо бэйэтин силиитин биэрдэ.
Былырыын Федеральнай испииһэккэ донордар ахсааннарыгар киирэргэ ыҥырыы таһаарбыттара. Петр Николаевич биир бастакынан донор буоларга сөбүлэспитэ.
Уҥуох силиитин хаан, искэн ыарыылаахтарга куталлар. Ыарахан ыарыы буолан, киһи олоҕо, өлөрө-тиллэрэ быһаарыллар. Силии донора көстөн биэрбэт, аны генетика өттүнэн сөп түбэһэрэ эмиэ уустук. 10 тыһыынча киһиттэн биирэ эрэ сөп түбэһэр эбит. Аны туран, киһиэхэ бэйэтин омугун бэрэстэбиитэлэ сөп түбэһэр кыаҕа улахан эбит. Онон ыарыһахха бу улахан табыллыы буолар.
Уҥуохтан силиини икки ньыманан ылаллар. Бастакытынан, хас да күн иннинэ анал укуолу биэрэллэр, ол көмөтүнэн, силии килиэккэлэрэ хааҥҥа киирэллэр. Онтон хааны ылан, анал сэппэрээтэр нөҥүө аһардан, “стволовай” килиэккэлэри арааран ылаллар. Донор хас да чаас систиэмэҕэ олорор.
Иккис ньымаҕа уопсай наркоз көмөтүнэн, утутан баран, силиитин ылаллар. Үксүгэр бастакы ньыманы туһаналлар, онон донор доруобуйатыгар охсуута кыра буолар.
Ангелина Васильева, “Саха сирэ” хаһыат, edersaas.ru