Тохсунньу 31 күнүгэр Дьокуускайга быйыл төрөөбүт бастакы оҕоҕо саҥа сокуон аныыр ыйдааҕы босуобуйаны аан бастаан туттардылар. Бу 418 №-дээх федеральнай сокуон тохсунньу 1 күнүттэн олоххо киирбитэ. Көмөнү РФ бэрэсидьиэнэ Владимир Путин көҕүлээбитэ.
Аан бастакынан босуобуйаны Далбараевтар дьиэ кэргэттэрэ тутта. Үөрүүлээх быһыыга-майгыга туттараары, СӨ бырабыыталыстыбатын бэрэссэдээтэлин солбуйааччы Алексей Дьячковскай уонна Үлэ, социальнай сайдыы миниистирин 1-кы солбуйааччы Елена Волкова кэлэн эҕэрдэлээтилэр.
Снежана уонна Дархан Далбараевтарга бастакы оҕолоро тохсунньу 12 күнүгэр төрөөбүтэ. Кэтэһиилээх күндү кыыстарын Айыына диэн ааттаабыттара. Эдэр ыалга судаарыстыбаттан ый аайы 17 тыһыынча солкуобай кэлэрэ — улахан көмө. Ол да иһин, ыал аҕата долгуйан туран, улаханнык махтанна.
Далбараевтар олунньуга 44 тыһ. солкуобайтан тахса сууманы ылыахтара. Бу суумаҕа ити федеральнай төлөбүрү сэргэ оҕо ыйдааҕы босуобуйата, оҕо көрөн олорууга босуобуйа, эдэр ыаллар бастакы оҕолоругар биирдэ бэриллэр көмө (6777 солк.) киирэр.
Алексей Дьячковскай өрөспүүбүлүкэ дойду үрдүнэн оҕо төрөөһүнүгэр биир бастакы миэстэҕэ сылдьарын бэлиэтээтэ. Бу быйылгыттан киирбит көмө эдэр ыалларга төһүү күүс буолара саарбахтаммат.
Оттон миниистири солбуйааччы Елена Волкова биир оҕонон муҥурдаммакка, соотору кэминэн Ийэ хапытаалын ылалларыгар баҕарда. Дьокуускай куорат социальнай көмүскэл управлениетын начаалынньыга Семен Матвеев Далбараевтар инникитин “ВИП персона” быһыытынан, управлениеҕа ураты балаһыанньанан туһаныахтарын туһунан эттэ.
Дьокуускайга бу төлөбүрү ыларга билиҥҥитэ үс дьиэ кэргэн сайабылыанньа биэрдэ. ЗАГС дааннайынан, Саха сиригэр тохсунньуттан ыла 56 ыалга бастакы оҕо төрөөбүт.
Санатар буоллахха, маннык төлөбүрү дьиэ кэргэн хас биирдии чилиэнигэр тиксэр тиийинэн олоруу алын кээмэйиттэн кыра дохуоттаах дьон ылаллар. Ол аата, холобур, үс киһилээх дьиэ кэргэн ыйдааҕы дохуоттара 79 206 солкуобайтан үрдүк буолуо суохтаах. Оҕо алта ыйыгар диэри сайабылыанньа биэрдэххэ, төрөөбүт кэмиттэн ыла, алта ыйдаах төлөбүрэ мунньуллан кэлэр. Оттон алта ыйын кэнниттэн биэрдэххэ, сайабылыанньа бэриллибит күнүттэн ааҕыллар. Оҕо биир сааһыгар сайабылыанньаны иккистээн биэриллэр. Төлөбүр оҕо балтараа сааһын туолуор диэри ананар.
Ангелина Васильева, “Саха сирэ” хаһыат, edersaas.ru