Анаабыр Үрүҥ Хайатыттан нэһилиэк баһылыгын солбуйааччы Анна Николаева иһитиннэрбитинэн, муммут-сүппүт дьону көрдүү бу сарсыарда Сааскылаахтан көппүт “Анаабыр алмаастара” хампаанньа бөртөлүөтэ Үрүҥ Хайаҕа тиийээт, төттөрү барбыт. Хомойуох иһин, бастакы көтүү түмүгэ суох буолбут.
-Бөртөлүөккэ Сааскылаахтан көрдүүр бөлөх дьоно сылдьыһаллар, — диир Анна Анатольевна. – Алларанан көтөн кэлбиттэр. Болохтору кэрийэн көрбүттэр. Биһиэхэ билигин манна барыта хаарынан бүрүллэн сытар, хара сир диэн суох. Онон үөһэттэн ырылыччы көстө сытар. Ол гынан баран, көлө суола элбэҕэ бэрт үһү. Балыксыттар, табаһыттар айаннаабыт суоллара-иистэрэ. Бөртөлүөттээх дьон, сүбэлэһэн баран, аны атын өттүнэн көрдүү бардылар.
Баһылык солбуйааччыта олохтоох дьон санаатын этэринэн, Туприннаах өрүһү быһа туораабатахтар, эбэни туораабыт суол ханан да суох үһү. Олег Туприн да, кини аргыһа, доҕоро Федот Спиридонов да тыаҕа сылдьа үөрүйэх дьон. Үрүҥ Хайа эр дьоно дьүккү бары – айылҕа оҕолоро. Онон, хараҥаҕа балыйтаран, олус ыраатан баран, көлөлөрө моһуоктаабыт буолуон сөп. Көлөлөрө сэбиэскэй “Буран” эбит, Олег Туприн киэнэ.
Василий НИКИФОРОВ, «Саха сирэ» хаһыат, edersaas.ru