«Чолбон» уус-уран литературнай уонна уопсастыбаннай-бэлитиичэскэй сурунаал устуоруйатыгар өссө биир умнуллубат түгэн буолла.
Олунньу 11 күнүгэр, Ийэ тыл, сурук-бичик күнүн көрсө 2021 сыл түмүгүнэн «Чолбон» сурунаал эрэдээксийэтэ Анемподист Софронов-Алампа аатынан «Бастакы эрэдээктэр бириэмийэтин» үөрүүлээхтик туттарда.
«Бастакы эрэдээктэр бириэмийэтин» Алампа төрөөбүт дойдутун Таатта улууһун Дьохсоҕон нэһилиэгин баһылыга Петр Егорович Захаров олохтоон, номнуо үһүс сылын туттарыллар.
Бу күн сурунаал бастакы эрэдээктэрэ Алампа аатын үйэтитэр бириэмийэни «Чолбон» сурунаал бас эрэдээктэрэ Гаврил Гаврильевич Андросов уонна Таатта улууһун Дьохсоҕон нэһилиэгин дьаһалтатын баһылыга Петр Егорович Захаров үөрүүлээх быһыыга-майгыга туттардылар.
Бастыҥнарынан кимнээх ааттаннылар?
Прозаҕа — суруйааччы Елена Васильевна Слепцова-Куорсуннаах «Дөлүһүөн сибэккитэ» уонна «Тыйыс тыын» сэһэннэрин иһин;
Поэзияҕа — бэйиэт Рустам Николаевич Каженкин «Кырыа кыһын сылаас тыллара» үс түһүмэхтээх хоһоон бөлөҕүн иһин;
Тылбааска – СӨ үтүөлээх артыыһа Кирилл Михайлович Семенов суруйааччы Николай Васильевич Гоголь «Ревизор» кэмиэдьийэтин тылбааһын иһин;
Публицистикаҕа — суруйааччы Эдуард Иванович Ефремов-Дэхси «Арктика сайдыыта уонна Саха сирэ» уонна «Саха сирэ ырыынак ыркыйыгар» ыстатыйаларын иһин;
«Бастыҥ саҕалааччы» — эдэр прозаик Мария Ивановна Винокурова «Аптаах чуораанчык» остуоруйатын уонна «Кыһын – саамай аптаах кэм» кэпсээнин иһин;
«Сүрүн сүбэһит» хайысхаҕа «Чолбон» сурунаал төрүттэммитэ 95 сылынан эрэдээксийэ үлэтигэр үгүс сыллаах көмөтүн иһин суруйааччы Семен Андреевич Попов-Сэмэн Тумат бириэмийэ лауреата буолла.
«Чолбон» сурунаал эрэдээксийэтэ олохтообут бу үтүө үгэһэ инникитин даҕаны ааптардары, суруйааччылары айар-суруйар үлэҕэ көҕүлүү турдун.
Надежда ЕГОРОВА, «Саха сирэ», edersaas.ru