Бүгүн СӨ Үөрэҕин уонна наукатын миниистирэ Михаил Сивцев пресс-конференция биэрдэ. Өрөспүүбүлүкэҕэ 636 нэһилиэнньэлээх пуун баарыттан, балаҕан ыйын 1 күнүн үөрүүлээх тэрээһинэ 339 нэһилиэккэ үгэс быһыытынан ааһыа диэн иһитиннэрдэ.
edersaas.ru
Быйыл оскуола боруогун 21 тыһыынча оҕо атыллыаҕа. Кинилэргэ балаҕан ыйын 1 күнэ олохторугар умнуллубат бэлиэ тэрээһининэн буолар. “Бүгүҥҥү күҥҥэ 636 нэһилиэнньэлээх пуун баарыттан, 339 нэһилиэккэ хамсык бэлиэтэнэ илик. Бу быһа холоон 52 бырыһыаҥҥа тэҥнэһэр. Онон үөрэх оскуолаларга улахан аҥаардарыгар үгэс быһыытынан (очнай ньыманан) барыаҕа. Бу үксэ кыра нэһилиэнньэлээх пууннар буолаллар. Өскөтүн хааччахтааһын киллэриллибит буоллаҕына, бастатан туран, биһиги маннык тэрээһини 1 кылааска киирэр эрэ оҕолорго салгыҥҥа, кылаастарынан арааран ыыталларыгар сүбэлиибит”, — диэн миниистир эттэ.
Оскуола дириэктэрдэрэ биир оҕоҕо тиксиэхтээх квадратнай миэтэрэ болуоссатыттан көрөн, тэрээһини ыытыахтарын сөбүн дуу, суоҕун дуу аттаран таһаарыахтаахтар диэтэ.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА).