Самаан сайыны көрсөр Улуу тунах ыһыахтар кэннилэриттэн тыа дьонугар дьылы быһаарар сүрүн үлэ – оттооһун кэмэ саҕаланна.
Былаан – 479 тыһыынча 361 туонна
Кыстыгы көрсө өрөспүүбүлүкэ үрдүнэн 479 тыһ. 361 т от, 24 тыһ. 334 т сиилэс итиэннэ 14 тыһ. 200 т сенаж бэлэмнэниэхтээх. Элбэх сүөһүлээх-сылгылаах улуустар былааннара улахан. Холобур, Мэҥэ Хаҥалас улууһа 44 тыһ. 695, Чурапчы 39 тыһ. 330, Таатта 37 тыһ. 765 т оту соҕотуопкалыахтаахтар. Отуттан тахсалыы туоннаны Амма, Ньурба, Сунтаар, Уус Алдан, Хаҥалас улуустара оттуохтаахтар.
Тыа хаһаайыстыбатын миниистирин солбуйааччы Николай Афанасьев салайааччылаах сүөһү аһылыгын соҕотуопкатын иилиир-саҕалыыр өрөспүүбүлүкэтээҕи ыстаап тэриллэн, өссө бэс ыйын саҥатыттан хас улуус ахсын үлэни сүрүннүүр кииннэр үлэлииллэр. Кинилэр салалталарынан нэһилиэктэр дьаһалтара, тыа хаһаайыстыбатын исписэлиистэрэ уонна хаһаайыстыбалар салайааччылара ходуһаларын кэрийэн көрөн, хайа сир хайдах үүммүтүн, төһө оту биэриэн сөбүн барыллаан көрдүлэр. Оттооһуну кэмигэр саҕалыыр туһугар оттугу-уматыгы хааччыннылар, тиэхиньикэлэри өрөмүөннээтилэр, ыраах учаастактарга барар суолу-ииһи оҥордулар, ходуһалар бүтэйдэрин сөргүттүлэр.
Аһыҥа турда!
Бүлүү эргин улуустарга үүнүү куһаҕана суох буоллаҕына, Намҥа, Хаҥаласка уонна илин эҥээр улуустарга үрдүк сиргэ сытар сыһыылар, алаастар курааннаабыттар. «Россельхозкиин» федеральнай судаарыстыбаннай бүддьүөт тэрилтэтин Саха сиринээҕи салаата эрдэттэн кэтээн көрүүнү ыытан, аһыҥа туран эрэрэ биллибит сирдэригэр барыта 1 тыһ. 80 (Мэҥэ Хаҥаласка 500, Уус Алдаҥҥа 368, Бүлүүгэ 160, Ньурбаҕа 50) гектар иэннээх ходуһа сирин эмтэппит. Бу биэдэмистибэ салайааччыта Агнесса Данилова, кураан дьыллар балаһалара саҕаламмытынан, кэлэр сылларга аһыҥаны дьааттыыр эминэн итиэннэ ону ыстарар тэрилинэн хааччынарга олохтоох дьаһалталар, үөһэттэн көмөнү эрэ кэтэспэккэлэр, бэйэлэрин бүддьүөттэриттэн үп көрөллөрө наадатын тоһоҕолоон бэлиэтээтэ.
Дьааҥыга үүнүү мөлтөх
Уһуннук турбут ойуур баһаардарыттан сылтаан Дьааҥы улууһугар балаһыанньа уустук. Улуус баһылыга Гаврил Чириков этэринэн, үүнүү чуолаан Арыылаах, Дулҕалаах, Боронук, Адыаччы нэһилиэктэригэр мөлтөх. Онон, төһө кыалларынан кытыы учаастактарынан көһөн оттуурга быһаарыммыттар. Билигин түөрт нэһилиэк биригээдэ тэрийэн ыраах оттото ыытарга бэлэм олорор эбит. Онуоха уматыгынан, мотуордаах хотуурдарынан хааччынарга, уонча көстөөх үрэхтэр бастарыгар биригээдэлэри бөртөлүөтүнэн илтэрэргэ итиэннэ кинилэр оттообут отторун тиэйэргэ көмө наада буолбут.
Кэбээйи саппааска оттуурга бэлэм
Өҥ сирдээх-уоттаах Кэбээйи улууһа өр сыллартан өрөспүүбүлүкэ хаһаайыстыбаларыгар саппаас оту хааччыйыыга үлэлиир. Улуустааҕы тыа хаһаайыстыбатын управлениетын салайааччы Василий Бессонов этэринэн, быйыл даҕаны үүнүү куһаҕана суох, от баар.
—Курааннаабыт, отторо тиийбэт туруктаах улуустар үчүгэйдик ааҕынан-суоттанан көрөн баран, сайаапкаларын эрдэттэн түһэрэллэрэ наада, – диир кини. – Былырыын сайын саппааска анаан 1 тыһ. 200 т оту бэлэмнээбиппититтэн, 840 туонната эрэ батарыллыбыта, ордубутун барытын сааскы халаан харайбыта. Ол иһин, биригээдэлэрбит дуогабар баар эрэ түбэлтэтигэр оттуохтара.
Миэстэҕэ хайдах үлэлииртэн тутулуктаах
Тыа хаһаайыстыбатын миниистирин солбуйааччы Николай Афанасьев салайан ыыппыт сүөһү аһылыгын бэлэмнээһини иилиир-саҕалыыр өрөспүүбүлүкэтээҕи ыстаап видеосибээс нөҥүө сүбэ мунньаҕар улуустар итиэннэ тустаах биэдэмистибэлэр бэрэстэбиитэллэрэ оттооһуҥҥа киирии туругун, үүнүү хайдаҕын, туох ыарахаттар баалларын туһунан иһитиннэрдилэр. Мунньаҕы түмүктүүрүгэр Николай Афанасьевич кураанынан сибээстээн, кэккэ улуустарга төһө даҕаны уустуктар баалларын үрдүнэн, ис кыахтары таба туһанан, туох ханнык иннинэ бэйэ сиригэр-уотугар, ыраах учаастактарга оттуур үлэни-хамнаһы тэрийэр соругу туруорда. Кыстыгы көрсө сүөһү-сылгы сыл тахсар отун бэлэмнииргэ, онуоха от хаачыстыбатыгар эмиэ улахан болҕомтону уурарга эттэ.
Сыыппара.
От ыйын 9 күнүнээҕи туругунан, өрөспүүбүлүкэ ходуһаларыгар 768 киһи, 298 биригээдэ оттуу сылдьар. Барыта 878 гектар ходуһа сирэ охсулунна, 164 туонна от кэбиһилиннэ.
Раиса Сибирякова, «Саха сирэ» хаһыат, edersaas.ru.