Саха Өрөспүүбүлүкэтин бастакы Бэрэсидьиэнэ, Саха Өрөспүүбүлүкэтин судаарыстыбаннай сүбэһитэ Михаил Ефимович Николаев эҕэрдэтэ
Саҥа дьылынан уонна Христос Ороһуоспатынан, күндү биир дойдулаахтарым!
Эһигини Саҥа 2019 сылынан ис сүрэхпиттэн уонна дириҥ ытыктабыллаахтык эҕэрдэлиибин!
Историяҕа ааһан эрэр 2018 сыл – Арассыыйа уонна өрөспүүбүлүкэбит таһымнарыгар бөдөҥ уопсастыбаннай-бэлитиичэскэй, социальнай-экэнэмиичэскэй түгэннэринэн толору.
Саҥа дьыл үүнээри турдаҕына, Өрөспүүбүлүкэ баһылыга А.С.Николаев “СӨ 2024 сылга диэри социальнай-экэнэмиичэскэй сайдыытын стратегическай хайысхаларын туһунан” уонна бу кэмҥэ өссө сиһилии “Саха Өрөспүүбүлүкэтин экология өттүнэн туруктаах буолуутун туһунан”, “Саха Өрөспүүбүлүкэтин инновационнай уонна цифровой сайдыытын туһунан”, “Саха Өрөспүүбүлүкэтигэр үөрэхтээһин сайдыытын стратегическай хайысхаларын туһунан”, “Саха Өрөспүүбүлүкэтин тыатын хаһаайыстыбатын сайдыытын стратегическай хайысхаларын туһунан” Ыйаахтарга илии баттаата. Ону сэргэ “2019 сылга Саха Өрөспүүбүлүкэтин Ил Дарханын Инвестиционнай анал этиитэ” норуокка этиллибитэ.
Онон олох кылгастык уонна чопчутук чугастааҕы сылларга Саха Өрөспүүбүлүкэтин сүрүн соруктара чопчуламмыттара уонна биһиги, 2019 сылга үктэнээри олорон, хас биирдии киһи бэйэтин үлэлиир салаатыгар чопчу дьыалаларынан дьарыктаныахтаах диэн чопчу өйдөбүлү ыллыбыт. Биһиги былыргыттан үлэни таптыырбыт, үтүө санаабыт, тулуурбут уонна кэрэҕэ тардыһыыбыт ситимниир тирэҕинэн буолан, биһиги норуоппут үйэлэргэ дьулуспут чэчирии сайдыыга ыра санаатыгар тиэрдиэҕэ.
Бэйэтин олоҕун историятыгар ыарахан тургутууну ааспыт хотугу норуоппут иннигэр турар уустук соруктары ситиһиилээхтик толоруоҕа диэн бүк эрэнэбин!
Ытыктабылы кытта, Михаил Николаев.