Өрөспүүбүлүкэ доруобуйатын харыстабыла өссө биир саҥа тутуунан эбилиннэ. Кулун тутар 4 күнүгэр Уус Алдан улууһун Тумул сэлиэнньэтигэр быраас амбулаториятын саҥа дьиэтэ аһылынна.
edersaas.ru
Саҥа дьиэни аһыы үөрүүлээх сиэригэр-туомугар Уус Алдан улууһун баһылыга Алексей Федотов, улуус баһылыгын социальнай боппуруостарга солбуйааччы Михаил Борисов, Тумул сэлиэнньэтин баһылыга Василий Алексеев, СӨ Доруобуйатын харыстабылын министиэристибэтин үлэтин хааччыйар управление дириэктэрэ Альберт Жирков, Уус Алдан улууһун Киин балыыһатын кылаабынай бырааһа Анна Петрова, амбулатория быраастара уонна бэтэрээннэрэ кытыннылар.
Альберт Жирков: “Кэнники сылга Уус Алдан улууһугар номнуо иккис мэдиссиинискэй тэрилтэ аанын арыйда. Бу хайысханан үлэ салгыы ыытыллыаҕа”, — диэн Тумул олохтоохторун аныгы көстүүлээх дьиэ аһыллыбытынан эҕэрдэлээтэ.
Бу историческай суолталаах тэрээһиҥҥэ нэһилиэк бастакы биэлсэрэ, норуот эмчитэ Егор Черкашин аата үйэтитиллэн, олохтоох балыыһаҕа иҥэрилиннэ. Тумуллар биир дойдулаахтара, суруйааччы Надежда Аржакова-Иванова нэһилиэк бастакы биэлсэрэ Егор Черкашин сырдык аатын үйэтитэн, “… Аата ааттана турдун” диэн анал хоһоонун анаата, сиэстэрэнэн үлэлээбит балыыһатыгар аныгы үйэ тэлэбиисэрин бэлэх уунна.
Манна 1967 сылтан сиэстэрэнэн үлэлээбит, суруйааччы, Дьокуускай куорат олохтооҕо Надежда Иванова-Аржакова күндү ыалдьытынан ыҥырылынна уонна үөрүүтүн маннык үллэһиннэ:
“Бу историяга хаалар долгутуулаах тэрээһинтэн нэһилиэк олохтоохторо, ыраахтан кэлбит ыалдьыттар бука бары сүргэлэрэ көтөҕүллэн тарҕастылар. Икки сыллааҕыта соһуччу суох буолбут балыыһа дьиэтин историятын сөргүтүүгэ матырыйааллары, хаартыскалары хомуйан, буклет, медиаслайд оҥорон көрдөрөн, үлэлээн ааспыт бэтэрээннэр, үрүҥ халааттаах аанньаллар ааспыт кэрэ кэмнэрин долгуйа аҕыннылар, махтал истиҥ тылларын эттилэр, өйдөбүнньүк хаартыскага түстүлэр. Инникитин балыыһа историятын сырдатар кинигэҕэ үлэлэһэргэ, Бороҕон нэһилиэгэр улэлээн ааспыт балыыһа бэтэрээннэрин, үрүҥ халааттаах аанньаллары үйэтитиигэ үлэ ыытыллара былааннанар. Бу үөрүүлээх күҥҥэ кыттыспыт ыалдьыттар тэрээһини үрдүктүк сыаналаатылар, нэһилиэк тэрилтэлэрэ, дьоно, ыччаттара, оҕолоро бука бары түмсүүлээхпитин, сомоҕолоһуулаахпытын көрдөрдүбүт”.
Манна даҕатан эттэххэ, быраас амбулаториятын дьиэтин тутуу 2019 сыллаахха саҕаламмыта. Биир сыл иһигэр тутуллубут 130 кв.миэтэрэттэн ордук иэннээх дьиэ аныгы ирдэбиллэргэ толору эппиэттиир, хаачыстыбалаах мэдиссиинискэй өҥөнү оҥорорго саҥа тэриллэринэн сэбилэннэ. Интэриниэт сибээһин көмөтүнэн эмчиттэр оройуон балыыһатын эрэ буолбакка, өрөспүүбүлүкэтээҕи балыыһалар сэдэх идэлээх исписэлиистэриттэн сүбэ-ама, ыйыы-кэрдии ылар кыахтаннылар.
Надежда ЕГОРОВА, “Саха сирэ”, edersaas.ru
Хаартыскалар – Доруобуйа харыстабылын министиэристибэтин саайтыттан.