Сарсын, балаҕан ыйын 26 күнүгэр, Судаарыстыбаннас күнүн көрсө Жатай олохтоохторугар анаан тутуллубут “Олимпия” бассейн үөрүүлээх быһыыга-майгыга арыллыаҕа. Бэлиэ күҥҥэ Ил Дархан Айсен Николаев ыалдьыттыаҕа.
Үс харбыыр суоллаах “Олимпия” бассейн харбааһынынан дьарыктанарга, күрэхтэһиилэри ыытарга, Жатай олохтоохторо чөл буолалларыгар анаан тутулунна. Маны таһынан, бассейн иккис этээһигэр дьарыктанар саала баар буолуоҕа.
Саҥа тутуу туһунан СӨ спорка миниистирэ Иннокентий Григорьев: «Аныгылыы тутуулаах, тупсаҕай саҥа бассейн олохтоохтор чэбдигирэр кииннэрэ буоларын туһугар кыаллары барытын оҥордубут. Саҥа бассейнтан чөмпүйүөннэр иитиллэн тахсыахтара диэн эрэнэбин», — диир.
Бассейн “Спорт — норма жизни” федеральнай бырайыак уонна “2016-2020 сылларга РФ-ҕа физкултуураны уонна спорду сайыннарыы” бырагыраама чэрчитинэн тутуллунна.
Саҥа тутуу уопсай иэнэ 1 579,84 кв.миэтэрэҕэ тэҥнэһэр. Бассейны Жатай уокуругун дьаһалтатын сакааһынан “Ярус” ХЭТ бэдэрээтчиттээн, “Дирекция по строительству” тэрилтэ тутта.
Тутуу уратыларын, үлэ хайдах барбытын туһунан тутааччы Святослав Чикачев кэпсиир:
— Тутуу үлэтэ 2012 сылтан саҕаламмыта. Үп Жатай бүддьүөтүттэн көрүллүбүтэ. Үлэ харчы баар кэмигэр тутуллар, суоҕугар тохтуур этэ. Быйыл федеральнай бүддьүөттэн харчы көрүллэн, тутуу үлэҕэ киирэн эрэр. Ити курдук, быһа холоон, саҥа эбийиэккэ 230 мөл. солк. барда. Бассейн бырайыагын “Регион-Север” тэрилтэ оҥорбута. Тутуу биир сүрүн уратытынан ис үрдүн каркаһа турбаларынан ууруллуута буолла. Маннык оҥоһуу Дьокуускайга саҥа туттулунна. Аны ититии систиэмэтэ сир аннынан тардылынна, тымныыны тулуйар гына анаан оҥоһуллубут пластик турбалары туһанныбыт. Бу ититиини туттарга ороскуота кыра буолар.
«Олимпия» бассейн “Дирекция по строительству” тэрилтэ бассейны тутуутугар бастакы уопута буолла. Тэрилтэ бу иннинэ өрөспүүбүлүкэ улуустарыгар, киинигэр оскуолалары, балыыһалары, олорор дьиэлэри туппута.
Айтана Аммосова бэлэмнээтэ, edersaas.ru
Хаартыскалар уонна бырайыактан быһа тардыылар «Дирекция по строительству» тэрилтэ архыыбыттан.