Ил Дархан Айсен Николаев быһа эпииргэ тахсыбытыгар араас хайысхалаах ыйытыылар киирдилэр. Ол курдук оҕо кииннэрэ хаһан аһыллыахтарай, бассейн хаһан үлэлиэҕэй диэн ыйыттылар.
— Бассейн үлэтэ коронавирус балаһыанньата хаһан тупсуор диэри тохтоон турар, оттон оҕо кииннэрин үлэлэтии туһунан толкуйдуохпут, бөлөҕүнэн арааран, бары хааччахтааһыны тутуһан туран үлэлэтиэххэ сөп.
Коронавирус дьаҥын үһүс долгуна кэлиэ дуо?
— Маассабай быһыыны ылбатахпытына, олунньу, кулун тутар ыйга куруук ОРВИ, гириип өрө турарынан, үһүс долгун кэлиэн сөп. Онон вакцина ыларга ыҥырабын.
Үөрэх кыһалара, кэллиэстэр хаһан үөрэххэ тахсыахтарай?
— Кулун тутартан тахсыахтарын сөп, өскөтүн коронавирус балаһыанньата тупсар түгэнигэр.
Оптуобус сылаас тохтобуллара тоҕо аҕыйахтарый?
— Хаһааҥҥытааҕар да тымныы кыһын буолла. Инникитин маннык тохтобуллар элбиэхтээхтэр. Саҕаламмыт үлэ түргэтиэхтээх.
Балыыһаларга коронавируһунан ыалдьааччылар ахсааннара хайдаҕый, куойка төһө элбэҕий?
— Уруккуга тэҥнээтэххэ, билигин куойка 40% туолан турар. 3000 куойкаттан 2000 тиийэ аччаттыбыт.
Ульяна Захарова, edersaas.ru