«Басхан» өрөспүүбүлүкэтээҕи дьыалабыай оонньуу балаһыанньата бигэргэннэ

Уһулуччулаах судаарыстыбаннай уонна бэлитиичэскэй диэйэтэл Гаврил Иосифович Чиряев 100 сылыгар аналлаах V-с төгүлүн ыытыллар «БАСХАН – 2025» өрөспүүбүлүкэтээҕи дьыалабыай оонньуу (куонкурус) балаһыанньата бигэргэннэ.

Оонньууну СӨ үөрэҕин уонна наукатын министиэристибэтэ, СӨ ыччат дьыалаларыгар уонна социальнай коммуникацияларга министиэристибэтэ төрүттээбиттэрэ.

Тэрийээччилэринэн СӨ оҕолорун уопсастыбаннай холбоһуктарын сойууһа, «Сахамедиа» өрөспүүбүлүкэтээҕи информационнай-издательскай холдинг, Үөһээ Бүлүүтээҕи «Тускул» оҕо киинэ, Үөһээ Бүлүүтээҕи «Сомоҕо» оҕо уопсастыбаннай хамсааһына, И.Н.Барахов аатынан СӨ судаарыстыбаннай түмэлэ буолаллар.

Куонкурус сүрүн сыалынан-соругунан уол оҕону сахалыы сиэргэ-майгыга, өйгө-санааҕа сайыннарыы, киэҥ эйгэҕэ таһаарыы, оҕолор түмэр-салайар дьоҕурдарын үүннэрии, төрөөбүт дойдуга үтүө сыһыаны, тапталы иитии буолар.

Дьыалабыай оонньуу өрөспүүбүлүкэтээҕи финала Дьокуускайга муус устар 8-10 күннэригэр ыытыллыаҕа. Манна улуустартан сүүмэрдээһини ааспыт 1-2 үөрэнээччи кыттыаҕа.

Балаһыанньаны кытта сиһилии манна билсиҥ.