Олунньу 10 күнүгэр «Биир ньыгыл Арассыыйа» бэлитиичэскэй баартыйа регионнааҕы сэбиэтэ быйылгы быыбардарга барыллаан куоластааһын күннэрин быһаарда.
Чокуур Гаврильев, «Саха сирэ» хаһыат, www.edersaas.ru
«Биир ньыгыл Арассыыйа» баартыйатын регионнааҕы политсоветын мунньаҕар барыллааан куоластааһын күннэрин быһаардылар. Ол курдук, муус устар 9 күнүгэр улуус уонна нэһилиэк баһылыгар хандьыдааттары праймериһынан талыахпыт. Оттон ыам ыйын 28 күнүгэр Дьокуускай куорат баһылыгар хандьыдааттар барыллаан куоластааһыны ааһыахтара. Праймериз былырыыҥҥы Госдуумаҕа барыллаан куоластааһын курдук ыытыллар. Ол аата ким баҕарар, «Биир ньыгыл Арассыыйа» баартыйаттан бэйэтин туруорунар хандьыдаакка кэлэн, куолаһын биэриэн сөп.
Биир ньыгыллартан Абый улууһун баһылыгар хандьыдааты быһаарар праймериз кулун тутар 3 күнүгэр ыытыллыаҕа. Абый улууһун баһылыга Михаил Никулин бэйэтэ баҕа өттүнэн астаапкаҕа барбытынан уонна бириэмэ ыгым буолан, барыллаан куоластааһын 3-с моделынан барар. Ол аата хандьыдааттары баартыйа чилиэннэрэ уонна өйөөччүлэрэ эрэ талаллар.
Ыспыраапка
Быйыл күһүн быыбардааччылар Дьокуускай куорат мэрин, 9 улуус баһылыгын, 217 нэһилиэнньэлээх пуун (нэһилиэк, бөһүөлэк) салайааччытын, 111 оройуоннааҕы олохтоох салайыныы мунньаҕын дьокутаатын талыахтара. Маны сэргэ, нэһилиэк 3145 дьокутаата быыбарданар. Үгэс курдук былаас баартыйата — «Биир ньыгыл Арассыыйа» — бары таһымҥа бэйэтин хандьыдааттарын күүскэ туруорар былааннаах.
Чокуур Гаврильев, «Саха сирэ» хаһыат, www.edersaas.ru